एकीकृत नेकपा माओवादीका अध्यक्ष पुष्पकमल दाहाल ‘प्रचण्ड‘ले संविधान जारी भएपछि एमालेको नेतृत्वमा सरकार बनाउने बारे तीन दलका शीर्ष नेताबीच यसअघि नै सहमति भएको बताएका छन्।
प्रधानमन्त्री निवास बालुवाटारमा सोमबार बसेको सर्वदलीय बैठकमा पार्टीका तर्फबाट कुरा राख्दै प्रचण्डले संविधान जारीगर्दा सम्म कांग्रेसको नेतृत्वमा र संविधानपछि एमालेको नेतृत्वमा सरकार बनाउने सहमति भएको कुरा स्पष्ट पारेको बैठकमा सहभागी एमाओवादी नेता नारायणकाजी श्रेष्ठले बताए।
‘बैठकमा साना दलले नयाँ सरकारको नेतृत्व एमालेलाई दिनेबारे तीन दलबीच भद्र सहमति भएको हो? भन्ने जिज्ञासा राखेपछि अध्यक्षले एमालेलाई सरकारको नेतृत्व दिने सहमति भएको स्पष्ट पार्नुभयो‘ बैठकपछि संवाददातासँग कुरा गर्दै एमाओवादी उपाध्यक्ष श्रेष्ठले भने।
नेताहरूबीच भएको भद्र सहमति अनुसार एमालेले पार्टीगत निर्णय गरेर अध्यक्ष ओलीलाई प्रधानमन्त्रीका लागि अगाडि सारिसकेको छ। र हाम्रो पार्टी भित्र सरकार गठनको लागि कुनै समस्या नभएको र औपचारिक निर्णय पार्टीको बैठकले गर्ने बताए।
प्रचण्डले नेताहरूबीच व्यक्तिगत रूपमा भद्र सहमति भएको विषय कांग्रेसले नमान्न पनि पाउँछ त्यो कांग्रेसको कुरो हो। तर, प्रधानमन्त्री कोइरालाले पटक पटकका बैठकमा ओलीजीलाई संविधान जारी भएपछि प्रधानमन्त्री बनाउन सहयोग गर्ने वचन दिँदै उहाँलाई ढुक्क हुन आग्रह गर्दै आएको बताए।
त्यसपछि बोल्ने क्रममा एमाले अध्यक्ष ओलीले विगतको सहमति बारे प्रचण्डले नै स्पष्ट पारसकेको हुनाले आफूले त्यस विषयमा थप बोलिरहुन नपर्ने धारणा राखेका थिए। प्रधानमन्त्री कोइरालाले भने भद्र सहमतिको विषयमा बैठकमा केही नबोलेको बैठकमा सहभागी एक नेताले बताए।
बैंठकबाट बाहिरिने क्रममा कोइरालाले पत्रकारसँग भने,‘ यो विषयमा पार्टीभित्र छलफल र निर्णय हुन्छ।’
यसअघि प्रधानमन्त्री कोइरालाले बैठकको सुरूआत गर्दै आफू मिडियमा आए जस्तो सरकारको नेतृत्व पुनः गर्ने भन्ने हल्ला मात्र भएको स्पस्ट पारेका थिए। ‘मिडियामा आएको हल्ला मात्र हो। मैले आफैले नेतृत्व गर्नुपर्छ भनेको छैन। सबै कुरा सहमति सहकार्य र एकतामै अगाडि बढ्छ।’
यस्तै कांग्रेस उपसभापति रामचन्द्र पौडेलले बैठकबाट बाहिरिदै भद्र सहमति भएको विषयमा प्रचण्डले अरू नेताहरूलाई पनि थाहा भएको भनेपनि यस्तो कुरा आफूलाई थाहा नभएको प्रतिक्रिया दिए।‘म विगतमा यस्तै व्यक्तिगत सहमतिको सिकार भएको व्यक्ति हुँ। र यस्ता व्यक्तिगत कोठे सहमतिले समस्या निम्तने छ।’
साना दलको जिज्ञासामा प्रधानमन्त्री कोइरालाले आफ्नो पार्टीले एमालेलाई नयाँ सरकारको नेतृत्व दिनेबारे औपचारिक निर्णय नगरेको बताउँदै सहमतीय सरकार बनाउने बारे पार्टीभित्र छलफल चलाउने बताएका थिए।