प्रधानमन्त्री सुशील कोइरालाले संविधान जारी भएपछि प्रधानमन्त्री लगायतका पदको बाँडफाँडका बारेमा तीन दलबीच भएको भद्र सहमतिबारे पार्टीभित्र छलफल गर्ने बताएका छन्। प्रधानमन्त्री निवास बालुवाटारमा सोमाबार बसेको सर्वदलीय बैठकपछि संवाददाताहरुसँग कुरा गर्दै कोइरालाले भने– मिलेर जाने भन्ने हो, तर पार्टी भित्र छलफल नगरेको विषयमा मैले कसरी भन्नु? पार्टीमा यसबारे छलफल चलाउँछु।
सर्वदलीय बैठकमा तीन ठूला दल नेपाली कांग्रेस, नेकपा एमाले र एकीकृत नेकपा माओवादीसहित १८ दलका नेताहरु सहभागी थिए। बैठकमा साना दलका नेताहरुले देश अहिले समस्यामा रहेकाले तीन दल एकताबद्ध भएर अगाडि बढ्नु पर्ने सुझाव दिएका थिए। ‘साना दलका साथीहरुले तपाईंहरुबीच संविधान जारी हुनुपूर्व पनि भद्र सहमति भएको थियो भन्ने छ, नभएको भएपनि नयाँ शिराबाट एकतावद्ध भएर देशको समस्या सामना गर्नुस् भन्ने सुझाव दिनुभयो‘ बैठकमा सहभागी एमाओवादी उपाध्यक्ष नारायणकाजी श्रेष्ठले भने। संविधान जारी भएपछि मधेसमा देखिएको समस्या र भारतको अघोषित नाकाबन्दी लगायतका विषयमा छलफल गर्न प्रधानमन्त्री कोइरालाले सर्वदलीय बैठक बोलाएका थिए।
यसअघि संविधान जारी भएपछि एमाले अध्यक्ष केपी शर्मा ओलीलाई प्रधानमन्त्री बनाउने लगायत मुख्य पदको बाँडफाँडका विषयमा तीन दलबीच भद्र सहमति भएको खबर सार्वजनिक भएका थियो।
असोज २१ गतेसम्म सहमतिबाट नयाँ प्रधानमन्त्री चुन्नका लागि राजनीतिक दलहरुबीच विभिन्न चरणमा छलफल चलिरहेको छ।
