देशका अन्य नाकाभन्दा सहज देखिएको रुपैडिया-नेपालगन्ज नाकाबाट आइतबार एउटा पनि पेट्रोलियम पदार्थ र ग्यासका गाडीहरु नेपाल भित्रिएनन्।
भारतले नेपालमा लगाउँदै आएको अघोषित नाकाबन्दी हटाइएको र पेट्रोलियम पदार्थको आयत सहज हुने भनिएको करिब २४ घन्टा बितिसक्दा पनि रुपैडिया नाकाबाट एउटा पनि पेट्रोलियम पदार्थ र ग्यासका गाडीहरु भित्रिएका छैनन्।
नाकाबन्दी हुदा बरू दैनिक ८ /१० गाडी पेट्रोलियम पदार्थ नेपाल भित्रिदै आएको थियो। नाकाबन्दी खुल्यो भनेपछि एउटा पनि गाडी पेट्रोलियम पदार्थ नभित्रिएको बताउँदै बाँकेको सीमास्थित एक सुरक्षा अधिकृत भन्छन्, 'नाकाबन्दी खुलेको हो कि झन कडा भएको हो बुझ्नै सकिएन।'
भारतको रुपैडियाबाट नेपाल भित्रनका लागि एक हप्त देखि पर्खाइमा रहेका पेट्रोलियम पदार्थका १७ र ग्यासका १५ वटा गाडी छन। ती गाडी आएनन् तर आलु , तरकारी र फलफूलका ८ /१० वटा गाडी आज पनि नेपाल भित्रिएका छन्।
आइतबार भारतमा बिदा हुने भएका कारण पेट्रोलियम पदार्थ र ग्यासका गाडीहरु नभित्रिए पनि सोमबार देखि सहज रुपमा भित्रन सक्ने जानकारहरु बताउँछन्। भोलि पनि पेट्रोलियम पदार्थ र ग्यासका गाडीहरु भित्रिने नभित्रिने कुनै टुङो छैन। यद्यपी हिजो साझ ८ बजे तिर भारतबाट ८ वटा पेट्रोलका गाडि नेपाल भित्रिएका थिए।
१५ गते ८ वटा डिजेलका ट्रयाङकरहरु र ३ वटा ग्यासका बुलेट सहित ३४ वटा मालबाहक गाडीहरु नेपाल भित्रिएका छन्।
भारतबाट नेपाल भित्रिएका पेट्रोलियम पदार्थ र ग्यासका गाडीहरुलाई नेपाल प्रहरी र शसस्त्र प्रहरीको टोलीले स्केटिङ गरेर गन्तब्यमा पुर्याउँदै आएको छ।
नाकाबन्दी खुलेको समाचार सार्बजनिक भए पछि किनमेलका लागि नेपालगन्जबाट भारतको रुपैडियामा पुग्ने सर्बसाधानहरुको भीड भने अन्य दिनको तुलनामा निक्कै बढेको छ।