मुलुकको मुख्य नाका वीरगन्ज-रक्सौलको सीमामा आज १० औ दिनपनि संयुक्त मधेसी मोर्चाले धर्ना जारी राखेका छन्।
संयुक्त लोकतान्त्रिक मधेसी मोर्चा र संघीय समावेशी मधेशी मोर्चाले वीरगंज र सीमावर्ती भारतीय सहर रक्सौललाई जोडने दशगजास्थित सिर्सिया खोलाको मितेरी पुलमा धर्ना दिएर नाका ठप्प पार्दै आएका हुन्।
उनीहरुले मितेरी पुलमा आलोपालो गर्दै धर्ना दिदै आएका छन्। धर्ना बसेका कारण यो नाकाबाट १० दिनदेखि आयात निर्यात पूर्ण रुपले ठप्प भएको छ।
वीरगन्ज नाकाबन्दीको नेतृत्व मोर्चाका नेता एवम् सद्भावना पार्टीका अध्यक्ष राजेन्द्र महतोले गर्दै आएका छन्। धर्नामा सहभागि हुन आएका तराई मधेस सद्भावना पार्टीका अध्यक्ष महेन्द्रराय यादवले मुलुकको समस्या प्रती सरकार उदासिन भएको आरोप लगाउँदै वार्ता सम्बन्धमा तीन दलले मिडियाबाजी बाहेक केही प्रयास नगरेको बताएका थिए।
शनिबारको धर्नामा तराई मधेश सदभावना पार्टीका अध्यक्ष महेन्द्र राय यादव, तमलोपाका महामन्त्री जितेन्द्र सोनल, नेपाल सदभावना पार्टीका केन्द्रीय सदस्य शिव पटेल, निजामुदीन समानी, फोरम नेपाल पर्साका अध्यक्ष प्रदीप यादव लगायतका हजारौ नेता तथा कार्यकर्ताहरुको सहभागिता रहेको थियो।
मधेसको मागप्रति विभिन्न संघ संगठनहरुले ऐक्यबद्धता जनाई धर्नामा बस्दै आएका छन्। नेपाल शिक्षक महासंघ पर्सा, साहित्यकार समाज, नेपाल चिकित्सक संघ, हाडवेयर एशोसिएसन, खुद्रा व्यवसायी संघ, किराना व्यवसायी संघ लगायत दुई दर्जन भन्दा बढी संघ संगठनहरू आन्दोलनप्रति एक्यबद्धता जनाउँदै नाकामा धर्ना दिएका हुन्।
