परराष्ट्र मन्त्रालयले भारतीय राजदूत रणजीत रायसँग नेपाल आउने सीमा नाकामा सवारी आवागमन रोकेकोमा स्पष्टीकरण लिएको छ।
कार्यवाहक परराष्ट्रमन्त्री खगराज अधिकारीले राजदूत रायलाई मन्त्रालयमै बोलाएर सीमा नाकामा नेपाली सवारी साधन रोकेको विषयमा जानकारी लिएका हुन्।
नयाँ संविधानलाई लिएर असन्तुष्ट देखिएको भारतले केही दिनदेखि सुरक्षाको कारण देखाउँदै सीमामा अवरोध गर्दै आएको छ । प्रमुख तीन दलको बिहीबार बसेको बैठकले सीमा नाकामा अवरोधबारे सरकारले भारतीय राजदूतलाई सोध्ने निर्णय गरेको थियो ।
परराष्ट्र मन्त्रालयका सहायक प्रवक्ता दीपक अधिकारीका अनुसार भेटमा कार्यवाहक परराष्ट्रमन्त्री अधिकारीले सीमामा भारतीय पक्षले किन नेपाल अाउने मालबाहक सवारीसाधन रोकेको भनेर सोधेका थिए। भारतीय राजदूत रायले भने सीमामा अवरोध गर्ने भारतको कुनै योजना नभएको र नेपाली पक्षको आन्दोलनका कारण अवरोध आएको जवाफ दिएका थिए। परराष्ट्रमन्त्री महेन्द्र पाण्डे राष्ट्रसंघ महासभामा सहभागी हुन गएकाले स्वास्थ्य मन्त्री अधिकारीले परराष्ट्रमन्त्रीको कार्यभार पनि सम्हालेका छन् ।
अाजै भारतीय विदेश मन्त्रालयले विज्ञप्ति जारी गरेर सीमा नाकामा अाफ्नो तर्फबाट अवरोध नभएको तर नेपाली आन्दोलनकारीले सीमा क्षेत्रमा अवरोध पुर्याइरहेको बताएको थियो ।