नेकपा एमालेले संविधान जारी हुने दिने असोज ३ गते दीपावली मनाउन र ४ गते विजय जुलुस निकाल्न आफ्ना नेता तथा कार्यकर्तालाई निर्देशन दिएको छ।
'विगत संघर्षका उपलब्धिहरूलाई संस्थागत गरिएको जनताको विजयको दिन र समाजवाद स्थापनाको दिशामा अघि बढ्ने राष्ट्रिय संकल्पको प्रस्थानबिन्दुका रुपमा यस दिनलाई लिनु पर्ने' पार्टी महासचिव इश्वर पोखरेलद्वारा बुधबार जारी विज्ञप्तिमा भनिएको छ।
जनताको विजयको सन्देश प्रभाव गर्न असोज ३ गते साँझ आ–आफ्ना घर, पार्टी कार्यालय र सार्वजनिक स्थलमा दिपावली गर्न पार्टीका सबै कमिटी, जनसंगठन तथा सदस्यहरू र आम जनसमुदायलाई एमालेले आग्रह गरेको छ। साथै असोज ४ गते विभिन्न संघ–संस्था, पार्टी र नागरिक समाजसँग सहकार्य गरी संयुक्त रुपमा जुलुस, र्याली, छलफल, अन्तर्क्रिया र गोष्ठीजस्ता स्थानीय विशिष्ठता अनुरुपका रचनात्मक कार्यक्रम आयोजना गर्न सबै स्वदेश तथा प्रवासमा क्रियाशील संगठनहरुलाई निर्देशन दिएको पनि विज्ञप्तिमा उल्लेख गरिएको छ।
