आन्दोलनकारीको ढुंगा प्रहारबाट आफन्तको मृत्यु भएको भन्दै मृतकका आफन्तहरुले ढुंगा प्रहार गर्ने आन्दोलनकारीमाथि कारबाहीको माग गर्दै इलाका प्रहरी कार्यालय कोहलपुर घेराउ गरेका छन्। दिउँसो ३ बजे तिर नेपालगन्जबाट कोहलपुर जादै गरेको भे ५ प ४२५० नम्बरको मोटरसाइकलमा सवार २२ वर्षीय करण सिंहको आन्दोलनकारीको ढुंगा प्रहारबाट मृत्यु भएको थियो।
आन्दोलनकारीले प्रहार गरेको ढुंगा मोटरसाइकलमा सवार सिंहको छातिमा लागेको थियो। घाईते सिहलाई उनलाई उपचारका लागि शिक्षण अस्पताल कोहलपुर लैजादै गरेको अवस्थामा मृत्यु भएको हो।
आन्दोलनकारीको नाममा यात्रु माथि ढुंगा प्रहार गर्ने उपर कारबाहीका माग गर्दै मृतकका आफन्तहरुले इलाका प्रहरी कार्यालय कोहलपुर घेराउ गरेको बाकेका प्रहरी उपरीक्षक वसन्त पन्तले बताए।
मोटरसाइकल यात्रुको ज्यान जाने गरी ढुंगा प्रहार गरेको घटना संलग्न रहेको आशंकामा बाँके प्रहरीले २५ जनालाई नियन्त्रणमा लिएको छ।
पक्राउ परेकामाथि छानबिन गरी दोषिमाथि कानुन बमोजिम हदैसम्मको कारबाही गरिने प्रहरी उपरीक्षक वसन्त पन्तले बताए।
यस्तै सोही मोटरसाइकलको पछाडि बसेका बाँके नौबस्ता २ विनोद शाही घाइते भएका छन्। घाईते शाहीको शिक्षण अस्पताल कोहलपुरमा उपचार भईरहेको छ।
