एमाओवादीका प्रवक्ता दिनानाथ शर्माले संविधानसभाबाट संविधान जारी नगर्न विभिन्न चलखेल भएको आरोप लगाएका छन्।
रफत सञ्चार क्लबले आयोजना गरेको साक्षातकार कार्यक्रममा बोल्दै शर्माले बिभिन्न चलखेल भएता पनि संविधानसभाबाट भदौसम्म संविधान जारी गर्ने र यसो नभए संविधानसभाले कहिल्यै संविधान जारी गर्न नसक्ने बताए।
‘सीमांकन र नामांकनका बारे जसरी विभिन्न आन्दोलन भएका छन् त्यसमध्ये थारूहरूका जायज मागलाई सम्बोधन गर्नुपर्छ। कर्णालीको माग सम्बोधन पश्चात कैलालीका थारुहरुको मागलाई सम्बोधन गर्न नसक्दा थारू समुदायले आफूहरु हेपिएको भान गर्नु स्वभाबिक भएता पनि मधेशमा भएको आन्दोनको भने कुनै औचित्य छैन,’ उनले भने।
कैलाली घटनामा माओवादीका पूर्व लडाकुहरुको घुसपैठ भएको भन्ने भनाईहरू निराधार भएको भन्दै माओवादी पार्टीलाई आरोप मात्र लगाउने काम भएको उनले बताए।
तराईमा भएको आन्दोलनको कुनै एजेन्डा नभएकाले एजेन्डा लिएर आन्दोलन गर्नुपर्ने भन्दै अनाहकमा नेपालीले ज्यान गुमाउनु परेको उनको तर्क थियो।
एमाओवादी अध्यक्ष प्रचण्ड र काँग्रेस नेता शेरबहादुर देउवा भारत पुगेर आएपछि सीमांकन र नामांकनका विषयले उग्ररुप लिएको भन्ने भनाईहरू गलत भएको उनले बताए। सींमाकन गर्दा विभिन्न राजनीतिक दलका प्रभावशाली नेताहरुले आफ्नो निर्वाचन क्षेत्रलाई ध्यान दिँदै अखण्ड र विभिन्न खालका स्वार्थका कारण विवाद देखा परेको हो।
मस्यौदा संकलनका बेला नेपाली नागरिकले दिएको दुई सुझाव मध्ये कार्यकारी राष्ट्रपति र सिंमाकनको विषयलाई पहिल्यै टुगांएर जाने बिषयमा काँग्रेस र एमालेले नमानेको भन्दै आफूहरुले नोटअफ डिसेन्ट लेख्दै संविधान जारीको बाटोमा अग्रसर बनेकाले माओबादीलाई संविधान जारीको अवरोधकारी ठान्नु गलत भएको उनको टिप्पणी थियो।
उनले नेपाली नागरिकता लिने सबै नेपाली भएको र गलत प्रक्रियाबाट नागरिकता लिएको भए त्यसलाई कारवाहिको दायरामा ल्याउने काम सरकारको भएकाले तत्काल फर्जी नागरिकता लिनेहरुको पहिचान गरेर कारबाही गर्नुपर्नेमा जोड दिए।
पछिल्लो समय नेपालका गृहमन्त्रीले आन्दोलनका समयमा भएको घुसपैठ बारे जसरी अभिब्यक्ति दिएका छन् आफ्नो मर्यादालाई भूल्दै आएको अभिब्यक्तिले सरकार कति कम्जोर छ भन्ने प्रष्ट पारेको बताए। ‘यदि घुसपैठ भएको छ भने कारबाही गर्नुपर्यो र शर्तकता अपनाउनु पर्यो तर जे पायो त्यो अभिब्यक्ति दिँदै हिँड्नु उचित हुन्न,’ उनले भने।
संक्रमणकालिन अवस्था भएकाले नेपालका राजनीतिक दलहरुले सजकता र सतर्कता अपनाउन नसक्दा बैदेशिक हस्तक्षेप बढेको भन्दै उनले भने। छिमेकीले आफ्नो अनुकुल काम गर्नु स्वभाविक भएको र नेपालको कमजोरी देखिएको हो।