थरुहट/थारुवान संयुक्त संघर्ष समितिको आन्दोलनका कारण दाङको देउखुरी क्षेत्रका विद्यालय,उद्योग,कलकारखाना तथा बजार २४ दिनदेखि खुल्न सकेका छैनन्।
पछिल्लो पटक साउन २७ यता देउखुरीमा एक दिन शिक्षण संस्था तथा बजार कलकालखाना खुल्न सकेका छेनन्। तर तुलसीपुर-घोराही लगायत अन्य क्षेत्रमा भने जिल्ला संयुक्त संघर्ष समितिले आन्दोलन खुकुलो पार्दे लैजाने निर्णय गरेबमोजिम शैक्षिक संस्था, बजार, यातायात सबै सञ्चालनमा आएका छन्। पूर्वपश्चिम राजमार्ग अन्तर्गतको लमही क्षेत्रमा प्रहरीको स्कटिङमा मात्रै गाडिहरू सञ्चालनमा आएका छन्। दाङलाई पनि सुरक्षा संवेदनशिल भन्दै भदौ सात गतेदेखि आगामी २२ गतेसम्म दंगाग्रस्त क्षेत्र घोषणा गरिएको छ।
संयुक्त संघर्ष समिति देउखुरी क्षेत्रका संयोजक हिरालाल चौधरीले देउखुरीको बन्द यथावत रहने बताएका छन्। उनले जिल्ला नेतृत्व आन्दोलन तुहाउने षडयन्त्रमा लागेको आशंका व्यक्त गर्दै जिल्ला नेतृत्वको भनाई आफूले नमान्ने प्रतिकृया दिए। देउखुरी क्षेत्रका संयोजक हिरालाल चौधरीले केन्द्रीय आन्दोलन अनुरुप जिल्लाको देउखुरी क्षेत्रमा मागपुरा नहुँदासम्म आन्दोलन यथावत रहने जानकारी दिए। चौधरीले भने ‘जिल्ला नेतृत्व चंगुलमा फसेको छ, आन्दोलन शुरु भएको भोलिपल्टै देखि विद्यालय खोल्न पाउनुपर्ने अधिकारकर्मीको जस्तै भाषा बोल्न थालेको हो।’
तुलसीपुरमा बुधवार बसेको संयुक्त आन्दोलन समितिका संयोजक तेजमान चौधरी नेतृत्वको गोप्य बैठकले भने जिल्लाको आन्दोलनलाई सबै पक्षले साथ र समर्थन गरेको भन्दै आन्दोलन शान्तिपूर्ण रुपमा गर्ने निर्णय गरेको थियो । अधिकारकर्मीहरुले पनि एउटै जिल्लामा थारु समुदायले फरक/फरक मापदण्ड कायम गराउन खोज्नु आश्चर्य भएको प्रतिकृया दिएका छन्। आफ्ना माग पुरा गराउने बहानामा शान्ति क्षेत्र घोषित विद्यालयहरु अनिश्चित कालसम्म बन्द गर्नु गलत अभ्यास भएको मानवअधिकार तथा शान्ति समाजका केन्द्रीय सदस्य सुशील वस्नेतले बताए।
अधिकारको मागगर्दै गरिने आन्दोलन जायज भएपनि त्यही बहानामा विद्यार्थीको पढ्नपाउने नैसर्गिक अधिकार खोस्नु गलत अभ्यास भएको उनले बताए। जिल्लामा विगत अढाई महिना यता विभिन्न बहानामामा झन्डै ९० दिन विद्यालय बन्द गरिदै आइएकोले वालवालिकाले पढ्न पाउनुपर्ने उनले बताए।
यसैबीच दाङका प्रमुख जिल्ला अधिकारी लोकनाथ पौड्यालले देउखुरी क्षेत्रमा आन्दोलनको नेतृत्व गर्दै आएका संयोजक हिरालाल चौधरी आफै सरकारी शिक्षक भएर आफै सरकारको नीति विपरित आन्दोलनमा उत्रिनु गैरकानुनी कार्य भएको बताए।
चौधरी गोवडिया उच्चमाविमा शिक्षा र संस्कृत विषय पढाउँदै आएका शिक्षक भएकोले आफै शिक्षकले विद्यालयको पढ्न पाउन अधिकार कुन्ठित गर्दा कारबाही हुन सक्ने जानकारी दिए। दंगाग्रस्त क्षेत्र घोषणा गरिएको भएपनि जिल्लामा कतै वल प्रयोग गर्नुपर्ने अवस्था नआएको तथा सबैले जिल्लाको वातावरण शान्त राख्न भूमिका खेल्नुपर्नै प्रजिअ पौडेलले तर्क गरे। तर थरुहट/थारुवाण संयुक्त संघर्ष समितिका देउखुरी क्षेत्रका संयोजक हिरालाल चौधरीले भने जिल्लाको सम्पूर्ण सुरक्षा दस्ता देउखुरीमा केन्द्रीत गरेर प्रहरी प्रशासनले थारू समुदायलाई दैनिक काममा जान समेत नदिएको आरोप लगाए ।
उनले भने ‘ राज्यले दुई जना थारु समुदायका केटा देख्यो कि केरकार शुरु गर्छ कुटपिट गर्छ तर गैर थारूलाई त्यस्तो गरिदैन,’ उनले थारुहरुको माग सम्वोधन नहुँदा सम्म देउखुरी क्षेत्रको आन्दोलन शान्त नहुने जानकारी पनि दिए।
