स्थानीय प्रशासनले वीरगञ्जमा चार दिनदेखि जारी कर्फ्युलाई बिहिबार खुकुलो गर्ने निर्णय गरेको छ।
पर्साका सहायक प्रमुख जिल्ला अधिकारी अनुज भण्डारीका अनुसार बिहीबार साँझ ५ देखि ७ बजेसम्मका लागि कर्फ्यु हटाइएको हो। अत्यावश्यकीय उपभोग्य सामाग्री प्रबन्धका लागि कर्फ्यु हटाइएको प्रशासनले जनाएको छ।
७ बजेपछि पुनःअनिश्चितकालका लागि कर्फ्यु जारी नै रहने बताइएको छ। मधेसवादी मोर्चाको आह्वानमा १९ दिनदेखि जारी अनिश्चितकालीन बन्द, प्रशासनको दङ्गाग्रस्त क्षेत्र घोषणा र कर्फ्युका कारण स्थानीय जनजीवन अत्यन्त कष्टकर बनेको छ।
शंकास्पद बस्तु
यता वीरगञ्जको नगवामा राखिएको शंकास्पद बस्तु अश्रुग्यासको खोका भएको पाइएको छ। बाइसपास सडकको नगवा इलाका प्रहरी कार्यालय नजिकै भेटिएको शंकास्पद पोको बम भएको आशङ्कमा डिस्पोजका लागि नेपाली सेनाको टोली पुगेको थियो। डिस्पोजका सबै विधि अपनाइए पछि सो अश्रुग्यासको खोकालाई रातो कपडामा बेरेर राखिएको पुष्टि भएको थियो।
आतङ्क मच्याउने उद्देश्यले राखिएको हुन सक्ने प्रहरीको आशङ्का छ।