नेपाल आदिवासी जनजाति महासंघका पूर्वमहासचिव आङकाजी शेर्पा लाई चार दिन थुनामा राख्न जिल्ला अदालत काठमाडौँले अनुमति दिएको छ।
बुधवार पक्राउ परेका शेर्पालाई प्रहरीले आजै अदालतमा उपस्थित गराएको थियो।
शेर्पामाथि अनुसन्धानका लागि चार दिन थुनामा राख्न अदालतले अनुमति दिएको काठमाडौँका एसपी विश्वराज पोखरेलले सेतोपाटीलाई जानकारी दिएका छन्।
शेर्पालाई साइबरक्राइम सम्बन्धि मुुद्दा लगाउने तयारी प्रहरीले गरेको छ ।
सामाजिक सञ्जालमा सामाजिक सद्भाव भड्काउने सामग्री पोष्ट गरेको आरोपमा पक्राउ परेका शेर्पालाई साइबरक्राइम सम्बन्धि मुद्धा दर्ता गरिने प्रहरीले जनाएको छ।
उनले टीकापुर घटनालाई लिएर सशस्त्र प्रहरी र नेपाल प्रहरीबीच फाटो ल्याउने सामग्री समेत पोष्ट गरेको महानगरीय प्रहरी अपराध महाशाखाका प्रमुख प्रहरी बरिष्ठ उपरिक्षक सर्वेन्द्र खनालले सेतोपाटीलाई जानकारी दिएका थिए।
खनालका अनुसार, अभियोग प्रमाणित भएमा शेर्पालाई १ लाख रुपैंया जरिवाना अथवा ५ वर्ष कैद वा दुवै सजाय हुनसक्छ।
