सरकारले अनसनरत डा गोविन्द केसीलाई माग पुरा भएकाले अनसन तोड्न आग्रह गरेको छ। बुधबार एक विज्ञप्ति जारी गर्दै प्रधानमन्त्री तथा मन्त्रिपरिषद् कार्यालयले मन्त्रिपरिषद्को सामाजिक समितिको मंगलबार बसेको बैठकमा राष्ट्रिय योजना आयोगका सदस्य (शिक्षा र स्वास्थ्य हेर्ने) को संयोजकत्वमा गठन भएको उपसमितिले दिएका १५ वटा नै सुझावलाई कार्यान्वयन गर्न सम्बन्धित निकायलाई पत्राचार गरिएकोले केसीलाई अनसन तोड्न गर्न आग्रह गरेको हो।
सरकारले केदारभक्त माथेमा नेतृत्वको कार्यदलले पेश गरेको प्रतिवेदन रहेका सुझावहरू कार्यान्वयन गर्ने सम्बन्धमा राष्ट्रिय योजना आयोगका माननीय सदस्यको संयोजकत्वमा अर्थ, शिक्षा र स्वास्थ्य तथा जनसङ्ख्या मन्त्रालयका सचिवहरू रहेको उपसमिति गठन गरेको थियो। सो उपसमितिले विभिन्न पक्षसँग छलफल गरी १५ वटा सुझाव कार्यान्वयन गर्न सिफारिश गरेको थियो।