प्रहरी र प्रदर्शनकारी झडप भएपछि रौतहटको गौर तनावग्रस्त बनेको छ।
सदरमुकाम गौरमा जिल्ला प्रशासन कार्यालयले तोकेको निषेधित क्षेत्र तोड्न खोजेपछि प्रहरी र प्रदर्शनकारीबीच झडप भएको हो। प्रहरीले केही राउण्ड अश्रुग्यास प्रहार गरेपनि झडप भइरहेको छ।
यस्तै प्रदर्शन उग्र हुँदै गएपछि जिल्ला प्रशासन कार्यालय धनुषाले केही सडकलाई निषेधित क्षेत्र तोकेको गरेको छ।
प्रमुख जिल्ला अधिकारी कालीप्रसाद पराजुलीद्वारा हस्ताक्षरित निर्देशमा जनकपुर उपमहानगरपालिका-४ स्थित मुरलीचोकदेखि कदमचोक, स्मशानघाटस्थित भूतनाथ मन्दिरदेखि जिल्ला अदालत, उतिमपुरस्थित कोष तथा लेखा नियन्त्रण कार्यालयदेखि आन्तरिक राजस्व कार्यालय बीचको सडकलाई निषेधित क्षेत्र तोकिएको छ।
महत्वपूर्ण सरकारी कार्यालयहरु रहेको क्षेत्र समेटिने गरी यी क्षेत्रलाई निषेधित क्षेत्र तोकिएको हो।
जनकपुरका विभिन्न ठाउँमा बिहानैदेखि प्रदर्शन भइरहेको छ।
जलेश्वरमा पनि आन्दोलनकारीले प्रहरीबिटमा आगो लगाएका छन्।
