हिन्दु राष्ट्रको माग गर्दै संविधान सभा भवन घेराउ गरिएपछि प्रहरीले प्रदर्शनकारीमाथि पानीको फोहरा र अश्रुग्यास प्रहार गरेको छ।
नयाँ संविधानमा नेपाललाई हिन्दु राष्ट्र उल्लेख गर्नुपर्ने माग सहित संविधान सभा घेर्न आएका राप्रपा नेपालका कार्यकर्ता, कांग्रेस नेता तथा पूर्वमन्त्री खुमबहादुर खड्का, कमलनयनाचार्य लगायत सहभागी भएको प्रदर्शनमा प्रहरीले हस्तक्षेप गरेको हो।
प्रदर्नकारीले प्रहरीमाथि ढुंगा समेत प्रहार गरेका छन्।
त्रिपुरेश्वरस्थित दशरथ रंगशालामा जम्मा भएका राप्रपा नेपालका कार्यकर्ता जुलुससहित नयाँ बानेश्वर पुगेका थिए।
कांग्रेस नेता एवं पूर्वमन्त्री खुमबहादुर खड्कासहितको टोली तीनकुनेबाट प्रदर्शन गर्दै बानेश्वर आएको थियो। जुलुसले नयाँ बानेश्वरमा प्रहरीको सुरक्षा घेरा तोड्दै अघि बढेपछि झडप भएको हो।
कमलनयनाचार्य नेतृत्वमा रहेका साधुसन्त पनि नयाँ बानेश्वरमा पुगेपछि स्थिति अझै तनावग्रसुत भएको हो।