दुई दिनदेखि लाग्दै आएको कर्फ्यू आज बिहान ६ बजे पछि हटाइएपछि बाँकेको नेपालगन्जको जनजीवन सहज बन्दै गएको छ।
बाँकेको कोहलपुरमा भने अहिले बिहान १० बजेदेखि दिउँसो ४ बजेसम्मका लागि कर्फ्यू आदेश जारी गरिएको छ।
यता नेपालगन्जमा रातभर लगाइएको कर्फ्यू खुले पछि स्थानीय बासिन्दा सडकमा निस्केका छन्।
भारतबाट घर फर्कने क्रममा सीमा नाकामा आइपुगेर रोकिएका नेपालीहरु आफ्नो गन्तब्य तर्फ लागेका छन्।
कर्फ्यू खुलेपछि दैनिक उपभोग्य पसलमा ग्राहकहरुको भीड लागेको छ। शान्ति सुरक्षाको अबस्था संबेदनशिल भए पछि बाँकेको नेपालगन्ज र कोहलपुरमा कर्फ्यू लगाइएको थियो।
नेपालगन्जमा कर्फ्यु खुले पनि सभा, जुलुश र समूह बनाएर हिडडुल गर्न नपाइने गरि निषेधाज्ञा भने काममै राखिएको छ।
नेपालगन्जका प्रमुख चोकहरुमा ठूलो संख्यामा सुरक्षाकर्मीलाई परिचालन गरिएको छ।
