नेकपा एमालेका बरिष्ठ नेता माधबकुमार नेपालले नेकपा माओबादीलाई चौथो शक्ति मान्न गल्ती भएको बताएका छन्। नेकपा माओवादीलाई वास्ता नगरी अघि बढ्न खोज्नु ठुलो कमजोरी भएकाले माओवादीको अस्तित्व स्विकार्दै सहमतिको लागि प्रयास गरिने उनले बताएका छन्।
प्रेस चौतारी कास्कीले आज पोखरामा गरेको पत्रकार सम्मेलनमा बोल्दै नेता नेपालले एकिकृत माओवादीले पन्छाउन खोजेपनि कांग्रेस, एमालेले बैद्य माआवादीलाई चुनावको पक्षमा ल्याउने दावी गरे।
आफू पछि पर्ने डरले एकिकृत माओवादीले पार्टीबाट फुटेको शक्तिलाई स्वीकार्न नसकेको उनको स्पष्टोक्ति थियो। वैद्य पक्ष चुनाबमा गए आफूलाई असर पर्ने भनि एकिकृत माओवादीले तयार पारेको रिपोर्ट बारे पत्रकारको जिज्ञासामा उनले त्यसमा सत्यता हुन सक्ने बताए।
असन्तुष्ट दलहरु र सरकारको बार्ता सकारात्मक रहेकाले दलहरुलसंगको छलफललाई पनि सहमतिमा पुर्याउन पहल गरिने उनले बताए। संबिधानसभाको चुनावलाई बिवादरहित बनाउने प्रयासमा दलहरु रहेको उनको जिकिर छ।
लोकतान्त्रिक पहिचान गुमाएर अतिवादी सोचलाई अघि नसार्न उनले नेकपा–माओवादीलाई सुझाब दिए। निर्वाचन मंसिर ४ मै हुने दाबी गर्दै उनले तोकिएको निर्वाचनलाई असर नपर्ने समयसम्म सहमतिको लागि प्रयास जारी राख्ने बताए।
निर्वाचनको मिति सार्नेभन्दा पनि तोकिएकै समयमा निर्वाचन सम्पन्न गर्ने गरी गृहकार्य भैरहेको र असन्तुष्ट दलहरुलाई पनि सहमतिमा ल्याउने उनको दावि छ।
पार्टीमा विवाद छ
पार्टीभित्रको बिवादको सन्दर्भमा उनले अध्यक्षको निर्णय नै सर्बोपरी हुने दाबी गरेका छन्। पार्टी अध्यक्षको निर्देशन बिपरित महिला युथफोर्स गठन गरिएकाले त्यसलाई मान्यता नदिने नेता नेपालले बताए। पार्टी नीति विपरित गठित संगठनको कुनैपनि गतिबिधिलाई मान्यता नदिने र गठित समिति पनि खारेज हुने उनले दाबी गरे। निर्वाचनको मुखमा पार्टी भित्रको बिवादलाई अन्त्य गरी सबै एकजुट हुनुको बिकल्प नरहेको नेता नेपालले बताए। पूर्बराजा ज्ञानेन्द्र शाहलाई पार्टी खोलेर राजनीतिमा आउन सल्लाह दिदै उनले राजतन्त्रको सपना नदेख्न सुझाब दिएका छन्। अब कुनैपनि हालतमा राजतन्त्र ब्युतन नसक्ने उनको जिकिर छ।
यसैबीच हिजो मात्र गठन भएको पुष्पलाल स्मृति प्रतिष्ठान कास्कीका पदाधिकारीलाई एमाले नेता नेपालले सपथ गराएका छन्। प्रतिष्ठानका केन्द्रीय अध्यक्षसमेत रहेका उनले पुष्पलाल स्मृति पार्क पोखरामा आयोजित एक कार्यक्रमकाबीच सपथ गराउँदै राजनीतिक सक्रियता बढाउनुको साथै पुष्पलालको माग निर्देशनमा अघि बढ्न कार्यकर्तालाई निर्देशन दिए।
म चुनावमा उठ्छु
अघिल्लो संविधान सभाको चुनावमा दुई ठाउँबाट हारेका नेपालले अब हुने संविधान सभाको चुनावमा पनि दुई ठाउँबाटै उमेद्वारी दिने बताएका छन्। उनले काठमाडौ र रोतहटबाटै उमेद्वारी दिने बताएका छन्। कुन क्षेत्रबाट उठ्ने भन्ने निणर्य नभएको उनले बताए।
