प्रमुख दलबीच ६ वटा संघीय प्रदेश कामय गर्ने गरी भएको सहमतिको बिरोधमा उत्रिएका मध्य पश्चिमका थारु र मधेशी पार्टीहरुले संघीय प्रदेशको राजधानी नेपालगन्ज कायम हुनुपर्ने भन्दै आन्दोलन शुरु गरेका छन्।
आदीवासी थारू र मधेशी पार्टीबीच सहकार्य गरी उनीहरुले कन्चनपुरदेखि चितवनसम्मको क्षेत्रलाई अबध मधेश थारूहट प्रदेश घोषणा गरी त्यो प्रदेशको राजधानी नेपालगन्ज कायम गर्नुपर्ने बताएका छन्।
नेपालगन्ज मध्य तथा सुदूरपश्चिमको प्रमुख औद्योगिक तथा ब्यापारिक शहर भएको र फराकिला सडक, बिहानदेखि साझैसम्म ब्यस्त बिमानस्थल, शिक्षा र स्वास्थ्य क्षेत्रका ठूल ठूला शैक्षिक प्रतिष्ठान, अस्पताल उद्योग कल कारखाना लगायतका भौतिक पूर्वाधार भएकाले अबध मधेश थारुहट प्रदेशको प्रादेशिक राजधानीका नेपालगन्ज नै सबै भन्दा उत्तम भएको तराई मधेश लोकतान्त्रिक पार्टीका केन्द्रीय सदस्य बरिष्ठ अधिबक्ता बिजय गुप्ताले बताए।
नेपालगन्जबाटै जितेका प्रधानमन्त्री सुशील कोइरालाले मध्य पश्चिमका जनताको चाहाना र भावना अनुसार काम गर्न नसकेका कारण आन्दोलनमा उत्रनु परेको नेपालगन्ज नगरपालिकाका पूर्व मेयर समेत रहेका गुप्ताले बताए।
संघीय प्रदेश निर्माण गर्दा भेरी अञ्चललाई बिभाजित गरी बाँके बर्दियालाई सुर्खेत दैलेख र जाजरकोटसँग अलग गरी राप्ति र लुम्बिनीका जिल्ला समेत समाबेश गरी नबलपरासीको दाउन्ने सम्मलाई समेटेर नया प्रदेश निर्माण गरिएका कारण नेपालगन्जबासी आक्रोशित छन्।
कर्णालीका दुर्गम बस्तीबाट जडिबुटी बेच्न नेपालगन्ज झर्नेदेखि नेपालगन्जबाट चामल कर्णाली पुर्याउने ब्यापारीसमेत अन्यौलमा छन।
प्रधानमन्त्री कोइरालाले समग्र मध्य पश्चिम र नेपालगन्जका लागि कुनै अडान नलिएका कारण मध्य पश्चिम टुक्रिएको र नेपालगन्जले संघीय राजधानी नपाएको आरोप लगाएका छन्।
