लिखित आदेशसमेत उल्लंघन गरी युवा संघले प्रशिक्षण गरेको भोलिपल्टै केन्द्रीय अध्यक्ष झलनाथ खनाल पक्षधरले मोरङमा ‘युवा किसान संघ’ (युथ पिजान्टस् फेडरेशन ‘वाईपीएफ’) नाम गरेको जनवर्गीय संगठन गठन गरेका छन् । एमाले नेताहरूका भनाइमा यो संगठनको मुख्य काम युवा संघभित्रको अपराध, भ्रष्टाचार, गुन्डाराज लगायत विकृति विसंगति रोक्ने हो । नेताहरूकै अनुसार युवासंघभित्र अपराध र गुन्डाराज मौलाउँदै गएपछि चिन्तित बनेको एमालेले त्यसलाई रोक्ने उपायस्वरूप किसान संघ गठन गरेको हो ।
महेश बस्नेतले स्वेच्छाचारी ढंगले संगठन सञ्चालन गरेको, इमानदार, निष्ठावान कार्यकर्तालाई पाखा लगाएर भ्रष्टाचारी र डनहरू भित्र्याउँदै गएपछि पछिल्लो समय एमाले नेतृत्व युवा संघदेखि ‘तनावपूर्ण’ बन्दै आएको विश्लेषण नेताहरूको
छ । एमाले मोर्चा विभाग मोरङका अनुसार संगठनमा युवा संघकै इमानदार र सच्चिन चाहने युवाहरूलाई समेटिँदै लगिने छ ।
‘प्रथम तथा ऐतिहासिक’ नाम दिइएको भेलाले पर्वतराज निरौलाको नेतृत्वमा युवा किसान संघ गठन गरेको छ । उक्त कमिटीमा मोरङका नौ वटै निर्वाचन क्षेत्रमा दुई÷दुई जनाका दरले समेटिएको छ । नगरका सबै वडा उक्त कमिटीले समेटेको छ । गठनलगत्तै यो कमिटीलाई गाउँ–गाउँ परिचालन भएर संविधानसभा निर्वाचनमा एमालेलाई बहुमत जुटाउन सहयोग गर्न नेताहरूले निर्देशन दिए । नवगठित कमिटीका पदाधिकारीलाई शनिबार पाञ्चालीस्थित जिल्ला पार्टी कार्यालयमा
एमाले नेता गोकर्ण विष्टले अबिर लगाएर बधाइ दिए । उक्त भेलालाई सम्बोधन गर्ने सबै नेताले पार्टीमा बसेर गुन्डागर्दी, भ्रष्टाचार गर्ने दिन समाप्त भएको र त्यसलाई रोक्न किसान संघले नेतृत्व लिएको घोषणा गरे ।
‘ठगी खाने युवाहरू माथि–माथि पुग्ने संस्कृति बिजारोपण हुँदै गयो भने समाज, देश समाप्त हुनेछ, युवाहरूको भविष्य अन्धकार हुनेछ । किसान संघले युवाहरूलाई मेहनत गर्न सिकाउन जरुरी छ परिश्रम गर्न जरुरी छ,’ विष्टले भने, ‘आज नेपाली
युवाहरूको बीचमा एउटा यस्तो संस्कृति देखा परेको छ । देखिँदैन कतै व्यापार छैन, रोजगारी कतै छैन, देखिँदैन कतै पैत्रिक सम्पत्ति तर रातारात अबरपति बन्ने लाम लागेको छ, रातारात करोडपछि बन्नेहरूको लाम छ । धनीहरु झन्–झन् धनी
बन्दैजाने, गरिबहरू झन् गरिब बन्दै जाने दिनहरू आइरहेका छन् ।
त्यसलाई रोक्नुपर्ने जिम्मेवारी तपाईंहरूको काँधमा आएको छ ।’ युवा संघको प्रशिक्षण भेलातर्फ संकेत गर्दै नेता विष्टले एउटा जनसंगठनले पार्टी चलाउने कि पार्टीले जनसंगठन चलाउने प्रश्न उठ्ने गरेको सुन्ने गरेको बताए । ‘यदि पार्टीले जनसंगठन निर्माण गरेको हो भने पुच्छरले शरीर हल्लाउँदैन, शरीरले पुच्छर हल्लाउँछ,’ खरो ढंगले प्रस्तुत हुँदै विष्टले भने, ‘त्यसकारण हामीले बुझ्न जरूरी छ, जुनसुकै संगठन पार्टीको सोच, विचार र फैसला मुताबिक चल्न सक्दैन ।’ ‘किसान हक अधिकारका निम्ति’ गठन गरिएको भनिए पनि यो संघ युवा संघकै हैसियतमा संविधानसभा निर्वाचनमा परिचालन गर्ने योजना एमालेको छ । उपाध्यक्ष बामदेव गौतमको धारणाअनुरूप गठन गरिएको यो संगठनका केन्द्रीय अध्यक्ष बाबुराम थापा हुन् । दुई महिनाअघि यो संघ काठमाडौंमा गठन गरिएको थियो । अध्यक्ष खनाल निकट थापा युवा संघमा महेश बस्नेतसँग पराजित भएका थिए ।
युवा संघको बैठकतर्फ इंगित गर्दै नेता विष्टले तमाम समस्याका बीचमा पनि समाधान आउने विश्वास दिलाए । केन्द्रीय कमिटीले यस्ता विवाद समाधान गर्ने उनले बताए । ‘तर नेकपा एमालेलाई धमिलो पार्न चाहेर, कमजोर बनाउन चाहेर सम्भव हुने छैन,’ उनले भने । केन्द्रीय सदस्य एवम् कोसी अञ्चल इञ्चार्ज राजेन्द्र गौतमले किसान संघ ‘सामुदायिक चरित्रको’ संगठन भएको बताए । एमाले मोरङ जिल्ला कमिटी अध्यक्ष महेश रेग्मीले एमालेको पछाडि अपराध, डन, गुन्डा, तस्कर भनेर जोडिँदा शिर निहुराउनु परेको बताउँदै इमानदार युवाहरू समेटिने यो संगठनले नयाँ ढंगको अभियान सुरूवात गर्ने बताए । ‘खराब काम गरेर युवाहरूलाई जेल पठाउने हैन, जेल परेकालाई सुधार्न किसान संघ गठन भएको हो,’ रेग्मीले भने ।
अनेरास्ववियु केन्द्रीय सदस्य तथा मोरङ जिल्ला सदस्य वसिम आलमले टेन्डर कब्जा गर्न, व्यापारीलाई धम्की दिन, चन्दा उठाउन नभएर त्यस्तो गर्नेलाई रोक्न र पीडितलाई संरक्षण दिन किसान संघ गठन गरिएको बताए । ‘मोरङमा मात्र नभएर
देशभरि यो संघ सक्रिय हुनेछ,’ उनले भने, ‘नेपाली जनताका हरेक समस्याका अगाडि यो संघ उभिनेछ ।’ एमाले जिल्ला सदस्य पारूल क्षेत्रीले इमानदार, जुझारू र निष्ठावान कार्यकर्तामात्र किसान संघमा आवद्ध हुने दाबी गरे । ‘एमालेमा बसेर टेन्डर कब्जा गर्ने दिन गए, बरू त्यसको हिसाब लिन संघ गठन भएको हो,’ क्षेत्रीले भने, ‘एउटै संगठनमा बसेको मान्छे कोही ६० लाखको कार चढ्ने, कोही ४ हजारको साइकल पनि चढ्ने हैसियत नराख्ने भइरहेको छ, यो अब अन्त्य हुन्छ ।’ मोर्चा विभाग प्रमुख रूपेश खतिवडाले अपराध, हिंसा र विकृति रोक्न संघ परिचालन भइसकेको बताए । संघको भेलामा नेपाल–खनाल समर्थित नेता–कार्यकर्ता मात्र थिए । एकै जना ओली पक्षधर उपस्थित नरहेको यो संघले ‘इमानदार’ कार्यकर्ता उत्पादन गर्ने दाबी
एमालेको छ । एमालेका एक जिल्ला नेताका अनुसार यो संघलाई ‘समानान्तर कमिटी’कै रूपमा बुझ्दा हुन्छ । गुन्डाहरू अघि लाएर महेश बस्नेतले पार्टीको निर्देशन नै अवज्ञा गर्न थालेको, उनलाई कसैगरी नियन्त्रण गर्न नसकेपछि नेतृत्वले यो रणनीति अघि सारेको उनको दाबी छ । संविधानसभा चुनावको मुखमा युवा संघको अराजक क्रियाकलापले परिणाममा असर पर्ने भन्दै संस्थापन पक्षका नेताहरू अहिले चिन्तित बनेको एक नेता बताउँछन् ।
तर नेता विष्टले किसान संघ कुनै संगठनलाई कमजोर बनाउन गठन नभएको जिकीर गरे । ‘युवा संघको कार्यक्षेत्र एक ठाउँ छ, यसको कार्यक्षेत्र अर्को ठाउँ छ,’ विष्टले सेतोपाटीसँग भने, ‘युवाहरूलाई रूपान्तरण गर्ने कार्यमा यो संघ लागिपर्छ ।’
एमाले नेतृत्वले रोक्न भन्दाभन्दै बिहीबार र शुक्रबार मोरङको गोठगाउँमा बस्नेतले युवा संघको केन्द्रीयस्तरको प्रशिक्षण भेला गराएका थिए । उक्त भेलाले यसअघि एमालेले विघठन गरिसकेको ‘युथफोर्स’ ब्यूँताउने निर्णय गरेको थियो । एकपक्ष अनुपस्थित रहेको ‘विवादास्पद’ भेला गराउँदा चुनावको मुखमा समग्र पार्टीलाई असर परेको एमाले नेताहरूको टिप्पणी छ । एमालले यो विषयमा केन्द्रीय कमिटीमा छलफल चलाउने तयारी गरिरहेको छ ।
क्याप्सन : किसान संघ गठनपछि निर्वाचित पदाधिकारी र कार्यकर्तासँग सामूहिक तस्बिर खिचाउँदै विष्ट । तस्बिर :खिलानाथ/सेतोपाटी