राष्ट्रपति डा. रामवरण यादवका साथ परराष्ट्रमामिला अध्ययन प्रतिष्ठानमा तालिमरत परराष्ट्रसेवाका नयाँ अधिकृत र प्रतिष्ठानका पदाधिकारीहरू । प्रतिष्ठानले कूटनीतिक सेवाका नयाँ अधिकृतलाई तालिम दिँदै आएको छ । तस्बिर: शरच्चन्द्र भण्डारी, रासस
राष्ट्रपति डा रामवरण यादवले राष्ट्रहित र राष्ट्रियताको प्रवद्र्धनमा कूटनीतिक सेवाका कर्मचारी पूर्ण जिम्मेवारका साथ क्रियाशील हुनुपर्नेमा जोड दिएका छन्।
परराष्ट्र मामिला अध्ययन प्रतिष्ठानमा तालिमरत परराष्ट्र सेवाका नयाँ अधिकृतसँग आज राष्ट्रपति कार्यालयमा भएको भेटमा उनले राष्ट्रसेवक सबै कर्मचारीले मुलुकको सर्वोपरि हितलाई केन्द्रमा राखेर कर्तव्य निर्वाह गर्नुपर्ने बताए।
मुलुकको परराष्ट्र नीतिबारे गहन अध्ययन गरी सेवासँग सम्बन्धित विषयमा आफूलाई अद्यावधिक राख्न सुझाउँदै उनले देशको गरिमा वृद्धि हुने काममा आफूलाई सधँै समर्पित गर्न ती अधिकृतलाई निर्देशन दिए।
सीमित स्रोत र साधनको उपयोग गरेर प्रतिष्ठानले कूटनीतिक सेवाका नयाँ अधिकृतलाई सेवाकालीन तालिम दिएकामा त्यसको सराहना गर्दै राष्ट्रपति यादवले आफ्नो सेवा विस्तार अझ सशक्त तुल्याउन आग्रह गरे।
त्यस अवसरमा प्रतिष्ठानका कार्यकारी निर्देशक डा. ऋषिराज अधिकारीले प्रतिष्ठानका गतिविधिबारे जानकारी दिएका थिए भने प्रशिक्षार्थीका तर्फबाट शाखा अधिकृत दीपक बिकले तालिममा सिकेका ज्ञान व्यवहारमा अनुवाद गर्ने प्रतिबद्धता व्यक्त गरेका थिए।
यही साउन २८ पूरा हुने तीन महिने सेवाकालीन उक्त तालिममा दुई महिलासहित आठ जनाको सहभागी छन्। रासस