प्रधानमन्त्री सुशील कोइरालाले विधिको शासन पद्धति स्थापित गर्दै राष्ट्रलाई समृद्धिको मार्गमा अग्रसर गराउन शीघ्र लोकतान्त्रिक संविधान जारी गर्न राजनीतिक दलहरु लागिपरेका स्पष्ट गरेका छन्।
सोमबार कोसी पुलको उद्घाटनपछि प्रधानमन्त्री कोइरालाले पूर्वाञ्चलको विकासका निम्ति मेरुदण्डका रुपमा रहेको कोसी पुलबाट सामाजिक, आर्थिक र पर्यटकीय क्षेत्रको विकासमा योगदान पुग्ने विश्वास व्यक्त गरेका हुन्।
मुलुकको विकास निर्माणका लागि वर्तमान सरकार पूर्ण प्रतिबद्ध रहेको बताउँद उनले भने, “जनताका इच्छा आकाङ्क्षा पूरा गर्न र देशलाई आर्थिक समृद्धिको बाटोमा डो¥याउन पुलजस्ता भौतिक पूर्वाधार निर्माणमा सरकार केन्द्रित रहेको छ ।”
अशान्ति, अस्थिरता र अराजकताले देश विकासको गतिलाई अवरुद्ध पारेकामा सम्पूर्ण नेपाली जनता चिन्तित रहेको पनि उनले उल्लेख गरे।
कृषि, पर्यटन र जलस्रोतको विकासबाटै मुलुक उन्नतिको दिशामा अघि बढ्न सक्ने बताउँदै उनले भने, “अब शान्ति, स्थायित्व र राष्ट्रिय एकताका निम्ति सम्पूर्ण नेपाली जनता र राजनीतिक दलहरु मिलेर अघि बढ्नुपर्छ ।”
“नेपालको पछिल्लो स्थितिबाट लगानीकर्ताहरु उत्साहित भएका र पर्याप्त लगानी गर्ने स्थिति बनेकाले शान्ति र स्थिरता खल्बलिने कुनै कार्य अब हामीले गर्नु हुँदैन”, प्रधानमन्त्री कोइरालाले भने,'लोकतान्त्रिक परिपाटी दिगो भएपछि विकासले पनि गति लिन्छ । विकासलाई नै केन्द्रमा राखेर बनाइएको नयाँ संविधान पनि चाँडै आउँदैछ ।”
अब बन्ने संविधानले महिला, जनजाति, दलित, आदिवासी, पिछडावर्ग, मुसलमानलगायतको हकहित सुनिश्चित गर्ने स्पष्ट गर्दै उनले संविधान च्यात्ने र सङ्घर्षमा उत्रने कामले मुलुकलाई अझै पछाडि धकेल्ने बताए। रासस