नेपाल ओलम्पीक कमिटीले गर्न लागेको अवैधानिक अधिवेशन रोक्न माग गर्दै सोमबारको संसद बैठकमा सभासदहरूले कुरा उठाएपछि सभामुख नेम्बाङले सभासदहरुले उठाएको नेपाल ओलम्पिक कमिटीको प्रश्नबारे यथार्थ विवरण अर्को दिनको सदनको बैठकमा जानकारी गराउन खेलकुद मन्त्रीलाई निर्देशन दिएका हुन्।
नेपाल ओलम्पीक कमिटीले गर्न लागेको अवैधानिक अधिवेशन रोक्न माग गर्दै सोमबारको संसद बैठकमा विशेष समय लिएर सभासद धनराज गुरूङले यसबारे खेलकूद मन्त्रीले जवाफ दिनुपर्ने बताएका छन्।
‘हामी विधिको शासनमा विश्वास गर्छौ। तर नेपाल ओलम्पिक कमिटीले साउन २१ गते अन्तर्राष्ट्रिय मान्यता प्राप्त संघहरुलाई थाहै नदिइ रातारात गुपचुपमा नयाँ संघ गठन गरी अवैधानिक ढंगले अधिवेशन गर्न खोज्दै छ,’उनले भने, ‘विधि र विधान विपरित गुपचुपमा अधिवेशन गर्न खोज्नु राजनीतिक अभिष्ट सँगै आर्थिक अभिष्ट देखिएको छ। यसबारे खेलकूद मन्त्रीबाट यथार्थ जवाफ सदनलाई जवाफ दिन माग गर्छु।’
यस्तै एमालेका सभासद कर्णबहादुर थापाले केही व्यक्तिहरुले आफ्नो व्यक्तिगत स्वार्थका लागि खेलकूद कमिटीलाई कब्जामा लिएर खेलकूद क्षेत्र अस्तव्यस्त र बदनाम बनाएको आरोप लगाए।
‘खेलकूद क्षेत्रलाई विकास भन्दा खेलकुदभित्र व्यक्तिगत स्वार्थमा कब्जा गर्ने होड छ। वैधानिक संघको पदाधिकारीलाई सार्वजनिक सूचना विना नै मनपरि ढंगले सहभागीता गराई ओलम्पीक कमिटीको अधिवेशन हुने काम हुँदै छ। केही व्यक्तिहरुले खेलकूद कमिटीलाई कब्जा गरी खेलक्षेत्रलाई बदनाम गराउने काम हुन लागेको हुदा तत्काल अधिवेशन रोक्न सरकारसँग माग गर्दछु।’
