संविधानमा नै अपाङ्गता भएका व्यक्तिको राजनीतिक अधिकार उल्लेख गर्नुपर्ने भन्दै उनीहरुले देशभरका जिल्ला प्रशासन कार्यालयमा आज घेराउ गरेका छन् ।
काठमाडौँमा बिहान ९ बजेदेखि ११ बजेसम्म विभिन्न प्रकारका अपाङ्गता भएका व्यक्तिले बालुवाटारमा धर्ना दिएका थिए भने सोही समयमा ७४ जिल्लाका प्रशासन कार्यालय घेराउ गरेका हुन् ।
आफ्ना माग पूरा नभएसम्म चरणबद्ध आन्दोलनका कार्यक्रम गर्ने भन्दै आज र भोलि प्रशासन कार्यालय घेराउ गर्ने कार्यक्रम रहेको राष्ट्रिय अपाङ्ग महासङ्घका अध्यक्ष सुदर्शन सुवेदीले जानकारी दिए।
उनले भन्नुभयो, “तीस लाख जनसङ्ख्या भएका अपाङ्गको अधिकार स्थापित गर्न राजनीतिक अधिकार अनिवार्य भएकाले संविधानमा राजनीतिक अधिकारको व्यवस्था हुनुपर्छ ।” उहाँले संविधानको धारा ४७ को सामाजिक न्यायको हकमा ‘अपाङ्गता’ शब्द छुटेको बताए।
यसैगरी प्रतिनिधिसभा, राष्ट्रियसभा, प्रदेशसभा र गाउँसभामा समेत समावेशी प्रतिनिधित्वमा ‘अपाङ्गता’ छुटेकाले त्यसलाई सच्याउनुपर्नेमा उनले जोड दिए।
विभिन्न दलका शीर्षस्थ नेता र सभासद्लाई भेटेर अपिलपत्र दिने र आफ्ना मागबारे जानकारी गराउने आफूहरुको कार्यक्रम रहेको अध्यक्ष सुवेदीले जानकारी दिए। रासस
