नेकपा–माओवादी नेतृत्वमा रहेको देशभक्त लोकतान्त्रिक मोर्चाले जनताको संविधान निर्माण गर्न सबै निर्वाचन क्षेत्रहरुमा जनताहरुको भेला (जनता दरवार) गर्ने भएको छ।
पार्टीले आईतवार रिपोर्टर्स क्लब नेपालमा पत्रकार सम्मेलन गरेर यथास्थितिमा यो संविधानसभाबाट जनताको संविधान नआउने दावी गर्दै अहिलेको मस्यौदाको सर्वत्र विरोध भईरहेकोलले जनताको भावना अनुसार संविधान निर्माण गर्न जनतामा जान लागेको स्पष्ट पारेको हो।
पत्रकार सम्मेलनमा मोर्चाका अध्यक्ष मनमोहन समसेर राणाले संविधानसभाले ल्याएको नयाँ संविधानको पहिलो मस्यौदाप्रति जनताको विरोध भएकोले जनताको पक्षमा संविधान बनाउन मोर्चाले जनताको धारणा बुझ्न जनता दरवार लगाउन खोजेको बताए।
उनले आगामि एक साताभित्र काठमाडौको क्षेत्र नम्बर १ बाट जनता दरवार सुरु गरेर देशभरीका निर्वाचन क्षेत्रमा आयोजना गर्ने भन्दै अहिलेको तालले समस्या समाधान नहुने ठोकुवा गरे।
सदस्य सुनिल प्रसाद शर्माले जनताको दरवार लगाएर सबै दल र जनता बसेपछि मात्र संविधान बन्ने भन्दै अहिलेको तालमा संविधान नबन्ने दावी गरे।
