सभापति सुशील कोइरालाले पार्टीका सभासद् अमरेशकुमार सिंहलाई कारबाही गर्ने प्रस्ताव गरेका छन्।
शनिबार बालुवाटारमा बसेको नेपाली कांग्रेस केन्द्रीय समितिको बैठकमा कोइरालाले अमरेशको गतिविधि पार्टी नीति विपरित भएको भन्दै कारबाहीको सिफारिस गरेको बैठकमा सहभागी एक केन्द्रीय सदस्यले बताए।
संसदीय दल र कार्यसमितिको संयुक्त बैठकपछि बसेको केन्द्रीय समितिको बैठकमा कोइरालाले यस्तो प्रस्ताव राखेका हुन्। कोइरालाको प्रस्तावमा सबै सबै केन्द्रीय सदस्यले सहमति जनाएको ती सदस्यले बताए।
बैठकमा विभिन्न सभासद् तथा केन्द्रीय सदस्यहरुले पनि पार्टीको नीतिलाई अवज्ञा गर्दै यस्ता उत्ताउला र अराजक अभिव्यक्ति दिने अमरेशमाथि कारबाही हुनुपने माग राखेपछि कोइरालाले कारबाहीको प्रस्ताव राखेका हुन्। उनलाई संसदीय दल तथा पार्टी अनुशासनको समितिबाट स्पष्टीकरण सोधेर कारबाहीको प्रक्रिया अघि बढाउनु पर्ने निर्णय बैठकले गरेको छ।
एमाओवादी नेता बाबुराम भट्टराईले आयोजना गरेको कार्यक्रममा सहभागी अमरेशले मधेसी दलहरुका माग पुरा नभए आफूहरु विखण्डनको पक्षमा लाग्ने र देश नै टुक्राएर देखाइदिने धम्की दिएका थिए।
पार्टीले संविधानको प्रारम्भीक मस्यौदामा सीमांकन र संघीयताको विषय स्पष्ट नभएको, विना सीमांकन मस्यौदा ल्याइएको र सर्वोच्च अदालतको आदेशलाई पार्टीले नटेरेको भन्दै अमरेश पार्टी लाइन विपरीत उभिएका छन्। उनको अभिव्यक्तिको सबै क्षेत्रबाट निन्दा भएको थियो। संसद्मा पनि उनको भ्रत्सना गरिएको थियो ।