मधेसी जनअधिकार फोरम नेपाल लोकतान्त्रिकका अध्यक्ष विजयकुमार गच्छदारले सीमांकनसहितकै संविधान जारी हुनेमा ढुक्क हुन सबै पक्षलाई आग्रह गरेका छन।
पूर्ण प्रेस स्वतन्त्रताको माग गर्दै रिपोर्टर्स क्लब नेपालका तर्फबाट अध्यक्ष ऋषि धमलाले बुझाएको ज्ञापनपत्र बुझ्दै उनले सीमांकन र नामांकनसहितको संविधान जारी गर्ने विषयमा दलहरु सकारात्मक छलफलमा रहेकोले त्यसमा विश्वस्त हुन आग्रह गरेका हुन्।
उनले मधेसको भावना समेटेर संविधान आउने दावी गर्दै उत्तर दक्षिणमात्र नभई जिल्लाहरु टुक्राएर भएपनि प्रदेशको निर्माण गरिने योजना सुनाए। दलहरुवीच यो विषयमा छलफल भईरहेको उनले प्रदेश निर्माण त्यती धेरै जटिल नभएकोले आफूलाई जिम्मा दिए एक साताभित्रमा सीमांकन टुङग्याएर संविधान जारी हुने ठोकुवा गरे।
गच्छदारले मस्यौदाको विरोधमा रहेका केही मधेसी दलहरुले वार्ता नै गर्दिनौ भन्नु अनुचित रहेको टिप्पणी गर्दै आफूहरु सीमांकन र नामांकन सहितको संविधान जारी गर्न लागि परेकोले बार्तामा बसेर समाधान खोज्न आब्हान गरे।
उनले भने– ‘बार्तामा बसेर समस्या समाधान गर्नुको साटो, बार्ता नै गर्दिन भन्नु यो कत्तिको लोकतान्त्रिक हो? मधेसका केही दलहरुले पनि अहिलेको अवस्थामा सीमांकन सहितको संविधान जारी गर्नको लागि बार्तामै बसेर समस्याको समाधान खोज्न लाग्नु पर्छ। हामी सीमांकन सहितको संविधान ल्याउन छलफलमा छौ। सीमांकनसहितको संविधान आउँदैन भनेर अफवाह नफैलाउनुस्।’
गच्छदारले आफ्नो लागि पहिला देशको र त्यसपछि मधेस र मधेसी जनताको एजेण्डा भएको स्पष्ट पार्दै आफूले १६ बुँदे सम्झौता पनि देशको हितलाई सोचेर गरेको बताए।
उनले भने– मैले राजनीतिक गर्दा सबैभन्दा पहिला राष्ट्र र जनता बनाउँछु। त्यसपछि मात्रै अरु एजेण्डा प्राथमिकतामा आउँछन। मैले सत्तामा जान १६ बुँदे सम्झौता गरेको होईन। संविधान, स्थायीत्व र विकासको लागि सम्झौता गरेको हो। विजय गच्छदार मधेसी विरोधी भयो, एजेण्डा छाड्यो भन्नु गलत हो। मेरो शरिरमा मधेस र मधेसीको रगत रगरगमा भरिएको छ। गच्छदार न कहिले मधेसी विरोधी थियो न रहने छ।
जनताले धार्मिक स्वतन्त्रता, धर्मनिरपेक्षता र हिन्दु राष्ट्रको पक्षमा सुझाव दिएको जानकारी दिदै जनताको राय अनुसार धार्मिक स्वतन्त्रता हुनु पर्ने पक्षमा आफू रहेकेा बताए।
गच्छदारले २४० क्षेत्र मध्ये १२–१४ वटा क्षेत्रमा मात्रै केही कारणले सुझाव संकलन हुन नसकेकोले राय आउनै सकेन भनेर भन्न नहुने भन्दै समग्रमा जनताको सुझाव आएको दावी गरे।