गणतन्त्र नेपालका प्रथम राष्ट्राध्यक्ष तथा पूर्वप्रधानमन्त्री गिरिजाप्रसाद कोइरालाको ९२औं जन्मजयन्तीका अवसरमा जिपी कोइराला प्रतिष्ठानले मंगलबार आयोजना गरोको कार्यक्रममा उनले भने, “आर्थिक विकासलाई मुल मुद्दा बनाएर अगाडि नबढ्ने हो भने छिमेकी देशको तुलनामा धेरै पछि पर्नेछौंँ त्यसकारण एकताबद्ध भएर आर्थिक विकासमा लाग्नुपर्छ ।”
दक्षिण एसिया विश्वका सबैभन्दा गरिब ‘सब कन्टिनेन्ट’ भित्रको पनि सबैभन्दा गरिब देश भएको बताउँदै उनले भने, “गरिबीको अपमान कहिलेसम्म सहिरहने, आत्मबलका साथ काम गरेर समृद्ध नेपाल निर्माणमा लाग्नुपर्छ ।”
कडा परिश्रम गरेर राष्ट्र निर्माणमा नलाग्ने हो भने भावी पुस्ताले यस पुस्तालाई क्षमा नदिने उल्लेख गर्दै उनले विपतको समयलाई अवसरका रुपमा लिएर पुनःनिर्माणमा लाग्नुपर्नेमा जोड दिए।
जिपी फाउन्डेसनका अध्यक्ष एवम् सभासद् सुजाता कोइरालाले पूर्व प्रधानमन्त्री गिरिजाप्रसाद कोइरालाको आधुनिक नेपाल निर्माण गर्ने सपनालाई पूरा गर्न पुनःनिर्माणलाई योजनाबद्धरुपमा अगाडि बढाउनुपर्ने बताइन्।
उनले प्रतिष्ठान र चीनका विभिन्न संस्थासँग सहकार्य गरेर दश गाउँका बस्ती निर्माणका लागि कार्यक्रम बनाउँदै गरेको जानकारी दिँदै सरकारले उपयुक्त योजना तथा रणनीतिमार्फत त्यसलाई कार्यान्वयनमा लगिने उल्लेख गरिन्।
राष्ट्रिय योजना आयोगका सदस्य डा स्वर्णीम वाग्लेले विपतपछिको आवश्यकता मूल्याङ्कन(पिडिएनए)को जगमा बसेर उच्चस्तरीय राष्ट्रिय पुनःनिर्माण प्राधिकरण तयार गर्ने कानुनी संरचना तयार भइसकेको उल्लेख गर्दै अब आवश्यक नीति तथा कार्यक्रम बनाएर कार्यान्वयनमा जान आवश्यक तयारी भएको जानकारी दिए।
राष्ट्रिय विज्ञान तथा प्रविधि प्रतिष्ठान(नाष्ट)का उपकुलपति प्रा डा जीवराज पोखरेल नेपालीको चाहनाअनुसारको सुरक्षित तथा आधुनिक पुनःनिर्माणले प्राथमिकता पाउनुपर्नेमा जोड दिँदै सहभागितामूलक अवधारणाका आधारमा कार्यक्रम तयार गरिनुपर्ने बताए।
राष्ट्रिय योजना आयोगका पूर्व उपाध्यक्ष डा जगदीशचन्द्र पोखरेलले पुनःवासको खोजीमा रहेका जनताको चाहनालाई सम्मान गर्दै कार्यक्रम ल्याउनुपर्नेमा जोड दिँदै अबको पुनःनिर्माणमा स्थानीय संस्कृति तथा सामग्रीले महत्व पाउनुपर्ने धारणा राख्नुभयो ।
कार्यक्रममा प्रधानमन्त्रीका सामाजिक विकास सल्लाहकार डा विजन पन्त र वरिष्ठ भूकम्पविद् हरिदर्शन श्रेष्ठलगायतले नेपाल र नेपालीको सांस्कृतिक पहिचानलाई ध्यानमा राखेर भूकम्पबाट सुरक्षित बस्ती विकास गर्नुपर्ने धारणा राखे। रासस
