नेकपा एमालेका अध्यक्ष केपी शर्मा ओलीले कृषि मन्त्री हरिप्रसाद पराजुलीसँग स्पष्टिकरण लिएका छन् ।
धान दिवसका अवसरमा हिजो मुलपानीमा भएको कार्यक्रमका भएको घटनाका बारे मन्त्री पराजुलीको चौतर्फी आलोचना भएपछि ओलीले आज अपरान्ह बालकोटमा नै बोलाएर स्पष्टिकरण लिएका हुन्। ओलीले मन्त्री पराजुलीले महिलालाई हिलो छ्यापेको बारे स्पष्ट पार्न लगाएका थिए ।
जवाफमा मन्त्री पराजुलीले संचारमाध्यमा आएको जस्तो घटना मुलपानीमा नभएको र अर्नगल प्रचार गरिएको भन्दै दु:ख व्यक्त गरेको बालकोट स्रोतले सेतोपाटीलाई जानकारी दियो। पराजुलीको हर्कतले पार्टीको समेत बदनाम भएको भन्दै ओलीले आफ्नो मर्यादा नभूल्न पराजुलीको ध्यानाकर्षण गरेका थिए ।
मन्त्री पराजुलीले ओलीसँग भेट गर्नुअघि एमाले उपाध्यक्षसमेत रहेका वामदेव गौतमसँग पनि गृहमन्त्रालयमा छलफल गरेका थिए। मन्त्रीले स्थानीय महिलासँग हिलो छ्याप्ने निहुँमा अभद्र व्यवहार गरेको भन्दै चौतर्फी आलोचना भइरहेको छ । यहि विषयलाई लिएर सामाजिक संजालहरुमा उनले राजीनामा दिनुपर्ने माग उठिरहेको छ भने संसदमा पनि उनको व्यवहारका बारे सांसदहरूले सरकारले जवाफ दिनुपर्ने माग गरेका छन्।
