गणतन्त्र दिवसको अवसर पारेर नेपाल सरकारले मुलुकभरका अदालतबाट ५४१ कैदीलाई जेलमुक्त गरेको छ।
कैद मिनाहा गर्नै नमिल्ने मुद्दा बाहेक अन्य मुद्दा खेपीरहेका कैदीलाई मन्त्रिपरिषदको सिफारिसमा रष्ट्रपतिले कैद मिनाहा गरेकाे गृह प्रवक्ता लक्ष्मी ढकालले सेतोपाटीलाई जानकारी दिए।
कारागारले, फैसला तोकिएको ५० प्रतिशत कैद भुक्तान गरिसकेका र जेल भित्र राम्रो आचरण गर्नेको बाँकी कैद मिनाहा गर्न मन्त्रिपरिषद समक्ष सिफारिस गर्छ। यस्तो व्यवस्था कानुनमै तोकिएको हुन्छ।
कानुनले १३ किसिमका मुद्दाका कैदीलाई भने कैद मिनाहा गर्न नहुने भनेको छ।
जिउ मास्ने बेच्ने, कैदबाट भागेभगाएको,जबरजस्ती करणी गरेको,भन्सार चोरी निकासि गरेको,लागुऔषध कारोबार,भ्रष्टाचार सम्बन्धी,जासुसी सम्बन्धी, संरक्षित वन्यजन्तु सम्बन्धी,पुरातात्वीक बस्तु सम्बन्धी,अपहरण, संगठीत अपराध,यौन शोषण बाल अपराध र ठगी गरेका कैदीको कैद भने मिनाहा गर्न पाइँदैन।
यसवर्ष प्रजातन्त्र दिवसमा कैद मिनाहा सिफारिस गरिएकालाई समेत जोडेर ५४१ कैदीको बाँकी कैद मिनाहा गरिएको हो।