गणतन्त्र दिवसका अवसरमा आज मन्त्री तथा सचिवहरुले गत वैशाख १२ गतेको विनाशकारी भूकम्पले भत्किएका विश्व सम्पदा सूचीमा सूचीकृत चाँगुनारायण मन्दिर परिसरका भग्नावशेष हटाउने कार्य गरेका छन् ।
सरकारले मुलुक विपत्तिमा रहेकाले गणतन्त्र दिवसलाई उत्सवका रुपमा नमनाउने निर्णय गरेसँगै सरकारका मन्त्रीहरु भूकम्पले भत्किएका भग्नावशेष हटाउन पुगेका हुन् ।
सो कार्यमा कानुन, न्याय, संविधानसभा तथा संसदीय मामिला मन्त्री नरहरि आचार्य, युवा तथा खेलकुद मन्त्री पुरुषोत्तम पौडेल, वन मन्त्री महेश आचार्य, परराष्ट्र मन्त्री महेन्द्रबहादुर पाण्डे, स्वास्थ्य मन्त्री खगराज अधिकारी, प्रधानमन्त्री कार्यालयका सचिव, विभिन्न मन्त्रालयका सचिवहरु, विभिन्न राजनीतिक दलका प्रतिनिधिलगायत स्थानीय सरोकारवाला निकायको सहभागिता रहेको थियो ।
भग्नावशेष व्यवस्थापन गर्ने कार्यक्रममा जिल्लास्थित विभिन्न सरकारी कार्यालयका कर्मचारी, नेपाली सेना, नेपाल प्रहरी, सशत्र प्रहरी र स्काउटको समेत उल्लेख्य सहभागिता रहेको थियो ।
त्यसैगरी गणतन्त्र दिवसकै अवसर पारेर आज भक्तपुर दरबार क्षेत्र, टौमढीलगायतका सम्पदा क्षेत्रमा पनि भग्नावशेष हटाउने कार्य भएको छ । रासस
