वैशाख १३ गते यता अहिलेसम्म करिब १५ लाख त्रिपाल भूकम्प पीडितको राहतका नाममा विभिन्न माध्यमबाट नेपाल भित्रियो।
यो संख्या हेर्दा भूकम्प पीडित परिवारका लागि प्रतिपरिवार कम्तिमा दुईवटा त्रिपालका दरले वितरण गर्न पुग्छ। तर, कतिपय भूकम्प प्रभावित जिल्लाका पीडितहरुले अहिलेसम्म त्रिपाल पाउन नसकेको गुनासो आउन छाडेको छैन।
अर्थ मन्त्रालय अर्न्तगत भन्सार विभाग स्रोतका अनुसार पीडितका लागि वितरण गर्न अहिलेसम्म ५ लाख ७३ हजारभन्दा बढी त्रिपाल भन्सार छुटमा निजी व्यापारीहरूले नेपाल भित्र्याएका छन्।
त्यसैगरी सरकारी निकाय र विभिन्न अर्न्तराष्ट्रिय दातृनिकाय तथा संघसंस्थाले थप ९ लाखभन्दा बढी त्रिपाल ल्याइसकेका छन्। त्यस अतिरिक्त बजारमा कतिपय व्यापारीहरुले पहिलेदेखि खरिदगरी विक्री वितरणको लागि राखेको त्रिपालको संख्याको कुनै लेखा जोखा छैन।
गृह मन्त्रालको पछिल्लो विवरण अनुसार अहिलेसम्म प्रभावित जिल्लाका ५ लाख ७ सय १७ घर पूर्ण रूपमा र २ लाख ६९ हजार १ सय ९० घर आंशिक रूपमा क्षतिग्रस्त भएका छन्। जुन संख्या जोड्दा कुल प्रभावित घरपरिवार संख्या ७ लाख ६९ हजार ९ सय ७ हुन आउँछ।
नेपाल भित्रिएको त्रिपाल संख्या र भूकम्प प्रभावित घरपरिवारको संख्या तुलना गर्ने हो भने पनि त्रिपालको संख्या पीडितको भन्दा दुई गुणा बढी हो।