नेत्रविक्रम चन्द (विप्लव) नेतृत्वको नेकपा माओवादीका कार्यकर्ताले भूकम्प पीडितको राहत तथा उद्धारमा खटिएका युवालाई कुटपिट गरेका छन्।
आइतबार दिउँसो राजधानीको खुलामञ्चमा भएको कार्यक्रममा नेकपा माओवादीका कार्यकर्ताले भूकम्प प्रभावितको उद्धार तथा राहत वितरणमा सक्रिय एक युवालाई कुटपिट गरेका हुन्।
माओवादीको पीटाइ खानेमा काठमाडौं न्युरोडका सुदिप कुँवर रहेका छन्।
पत्रकार सम्मेलनमा माओवादीका महासचिव चन्दले नेकपा माओवादीले गरेको काममा साथ दिए जेठ महिनाभित्र नेपाल अर्कै ठाउँमा पुग्ने दाबी गरेपछि पत्रकारपछि बसेका एक युवाले कसैले नागरिक राहत नपाएर छटपटिइरहेका बेला अहिले कुरा भन्दा काम आवश्यक भएको भनेका थिए।
पत्रकारभन्दा माओवादीका कार्यकर्ता बढी भएको कार्यक्रमको भीडमा भूकम्प प्रभावितको उद्धारमा सक्रिय न्युरोडका कुँवरको उक्त भनाइमाथि माओवादीका कार्यकर्ता जाइलागेका थिए।
प्रहरीले रोक्न खोज्दा माओवादीका कार्यकर्ता रोकिएनन्। आफ्ना कार्यकर्ताबाट युवकमाथि कुटपिट हुँदा महासचिव चन्द लगायतका नेता मञ्चमा थिए।
तर कुनै पनि नेताले आफ्ना कार्यकर्तालाई सम्हाल्ने प्रयास नगरेको क्टपिटबाट घाइते भएका कुँवरले बताए।
रगताम्य भएका कुवरलाई प्रहरीले अस्पताल पुर्याएको थियो।
महाबौद्धस्थित मित्र युवा क्लबका सदस्यसमेत रहेका कुँवरले आफू निर्दोष रहेको दाबी गरेका छन्।
यसअघि महाबौद्धमा एक घरमा पुरिएर ज्यान गुमाएका पत्रकार सुमन भोम्जनको शव उत्खनन्मा पनि सक्रिय कुँवर प्रहरीसँगै सक्रियरुपमा उद्धार र राहतमा खटिरहेका थिए। कुटपिटमा संलग्नको खोजी भइरहेको प्रहरीले बताएको छ ।
