नेकपा–माओवादीका अध्यक्ष मोहन वैद्यले भूकम्पका कारण भक्तपुरमा परेको धनजनको क्षतिबारेमा जानकारी लिँदै आफ्नो कार्यकर्तालाई राहतमा जुट्न निर्देशन दिएका छन्।
भूकम्प प्रभावित मध्यपुरथिमि शङ्खधर चोक, बालकुमारी, लाछिटोल, शिवाटोल, ताहाननी, पोबुलगायत क्षेत्रको स्थलगत निरीक्षण गर्दै उनले ती क्षेत्रमा आफ्नो कार्यकर्तालाई भत्किएका भौतिक संरचनाको पुनःनिर्माणमा स्वयम्सेवीको भूमिका निर्वाह गर्दै राहतमा जुट्न आग्रह गरेका हन्।
नेता वैद्यले मध्यपुरथिमिका सहिद बैकुण्ठहरि श्रेष्ठ र सविन श्रेष्ठको घरमा पुगी भूकम्पबाट भएको क्षतिबारे समेत जानकारी लिएका थिए। सोही क्रममा अध्यक्ष वैद्यले कुरा गर्दै भूकम्पपछि सरकार एक्लैले मात्र राहत र पुनःस्थापनामा लागेर नपुग्ने भएकाले केन्द्रदेखि जिल्ला, नगर, गाउँ, वडासम्म सबै पार्टी सम्मिलित सर्वदलीय संयन्त्रमार्फत राहतका कार्यक्रम अगाडि बढाउनुपर्ने बताए।
उनले भने–“सरकार एक्लै वा पार्टीगत र संस्थागत रुपमा छुट्टाछुट्टै उद्धार तथा राहत वितरण गर्दा राहतको दुरुपयोग हुन सक्ने र असहज परिस्थिति सिर्जना हुन सक्नेतर्फ सचेत हुनु जरुरी छ ।”
सरकारले छिटोभन्दा छिटो सबैबीच समन्वय गरेर अगाडि बढ्न आवश्यक रहेकामा जोड दिँदै उनले महाविपद् सामना गर्नका लागि आफूहरु सरकारसँग मिलेर काम गर्न तयार रहेको बताए।
भूकम्पपीडितको राहत तथा उद्धारका लागि पार्टीका नेताहरुको कार्य विभाजनसमेत गरिएको छ । सोअनुसार काठमाडौँ उपत्यकामा अध्यक्ष वैद्य आफैँ, सिन्धुपाल्चोक, काभ्रेलगायत क्षेत्रमा उपाध्यक्ष सिपी गजुरेल, नुवाकोट धादिङ, चितवनलगायत क्षेत्रमा महासचिव रामबहादुर थापा, गोरखालगायत क्षेत्रमा सचिव देवप्रसाद गुरुङलाई जिम्मा दिइएको छ ।
त्रिपाल माग
भूकम्प प्रभावित क्षेत्रका स्थानीयवासीलाई भेट्दा अधिकांशले बस्नका लागि त्रिपालको माग गरेकाले त्यसको उचित व्यवस्थापन आवश्यक रहेको वैद्यको भनाइ छ। अध्यक्ष वैद्यले विदेशी उद्धारकर्मीले नेपालको राष्ट्रिय स्वाधीनताको र सार्वभौमिकताको ख्याल गर्नु जरुरी रहेको बताउँदै मुलुकलाई आँच आउने गतिविधितर्फ सरकार गम्भीर हुनुपर्नेमा जोड दिए। रासस