संविधानसभामा प्रतिनिधित्व गर्ने विभिन्न राजनीतिक दलले भूकम्प पीडितको उद्धार, राहत तथा पुनःस्थापनाका लागि सबै सरकारी तथा गैरसरकारी संयन्त्रलाई प्रभावकारी रुपमा परिचालन गर्नुपर्नेमा जोड दिएका छन् ।
सभाध्यक्ष सुवास नेम्वाङको पहलमा आज भएको सर्वदलीय बैठकमा सहभागी संविधानसभामा प्रतिनिधित्व गर्ने राजनीतिक दलका नेताहरुले सरकारको हालसम्मको गतिविधि प्रभावकारी नभएको र पीडितले उद्धार र राहत नपाएको भन्दै आपत्ति प्रकट गरेका थिए ।
जनता खुला आकासमुनि अनिदै रात काट्न बाध्य भएपनि त्यसप्रति सरकार गम्भीर नभएको र सरकारी संयन्त्रको परिचालन जे जति हुनुपर्ने हो सो हुन नसकेको भन्दै उनीहरुले भूकम्प पीडितको उद्धारमा कुनै पनि कन्जुस्याईं नगर्न आग्रह गरेका हुन् ।
शनिबार गएको भूकम्पका कारण गोरखा, धादिङ, नुवाकोट, सिन्धुपाल्चोक, दोलखा, रामेछाप, काठमाडौँ, भक्तपुर, ललितपुर विशेष प्रभावित भएपनि राजधानीमा नै पीडितले राहत नपाएकामा गुनासो गरेका थिए ।
जनताले सही र तथ्पूर्ण सूचना प्राप्त गर्न नसकेको, सञ्चार माध्यमको सूचना द्विअर्थी लाग्ने खालका भएका कारण पीडामा झन् पीडा थपिएको भन्दै नेताहरुले अपवाह फैलाउने र गलत प्रचार गर्नेलाई कडा कारबाही गर्नसमेत माग गरेका थिए ।
खुला आकासमा रात गुर्जान बाध्य भएकालाई पहिलो चरणमा उद्धार गर्न, एकथान भएपनि पालको व्यवस्था गर्न, पिउनेपानी, खाद्यान्न उपलब्ध गराउन सरकारको ध्यानाकर्षण गराएका थिए ।
राजधानीमा नै राहत तथा उद्धार नभएको अवस्थामा अन्य जिल्लामा सरकारको उपस्थिति नै नदेखिएको भन्दै सम्पूर्ण शक्ति परिचालन गरेर जनतालाई उद्धार र राहतको व्यवस्था गर्न आग्रह गरेका हुन् ।
नेपाली काँग्रेसका वरिष्ठ नेता शेरबहादुर देउवाले भूकम्प पीडितलाई सामान्य सेवा तथा सुविधा प्राप्त हुन नसकेको आपत्ति प्रकट गर्दै तत्काल सम्पूर्ण शक्ति परिचालन गर्न आग्रह गरे।
उनले पसल खुल्न नसक्दा जनता खान नपाउने स्थितिमा पुगेको, अक्सिजन, रगतको अभाव भएको र सरकारी संयन्त्रको परिचालनमा व्यवस्थापकीय समस्या देखिएकाले तत्काल सुधार गर्नुपर्नेमा जोड दिए।
नेकपा(एमाले)का अध्यक्ष केपी शर्मा ओलीले जनतालाई राहत तथा उद्धार गर्नु कुनै पनि कमजोरी नगर्न आग्रह गर्दै सबै राजनीतिक दलले आ आफ्नो भातृ सङ्गठनलाई समेत परिचालन गर्नुपर्ने र मानवीय सहयोग उपलब्ध गराउनुपर्ने धारणा राखे।
उनले यो समय गफ गर्ने र बैठक गर्ने समय नभएकाले तत्काल जनतालाई सेवा दिन जुट्नुपर्ने र राष्ट्रिय तथा अन्तर्राष्टिय क्षेत्रलाई सहयोगका लागि आह्वान गनुपर्ने धारणा राखे।
एकीकृत नेकपा(माओवादी)का अध्यक्ष पुष्पकमल दाहालले बैठक मात्रै राख्ने र जनता खुला आकाशमा बस्नुपर्ने अवस्थाको अन्त्य गर्न सरकार र राजनीतिक दलले आफ्नो संयन्त्र पूर्ण रुपमा परिचालन गर्नुपर्नेमा जोड दिए।
प्रभावित क्षेत्रमा सरकारको उपस्थिती कमजोर देखिएकाले तत्काल त्रिपालको व्यवस्था गर्न, औषधिमूलो, खाद्यान्नको व्यवस्था गर्नुपर्ने तथा कुन स्थानमा कुन सेवा तत्काल दिनुपर्ने हो सो को व्यवस्था गर्न आग्रह गरे।
यस्तै बैठकमा सहभागी राप्रपाका संसदीय दलका नेता दीपक बोहोरा, सभासद् गोपाल दहित, प्रेम सुवाल, प्रेमबहादुर सिंह, अशोक राई, जयदेव जोशी, रामकुमार राई, लोकमणि ढकाललगायतले भूकम्प पीडितको उद्धारमा सरकारको उपस्थिति नै नदेखिएको भन्दै आपत्ति प्रकट गरेका थिए।
उनीहरुले मानवीयताका आधारमा कुनै पनि तर्क र कारण देखाएर एक अर्कालाई दोष नदेखाउन आग्रह गरेका थिए । खाद्यान्न, पिउनेपानी, औषधिमूलोको व्यवस्था गर्न र सबै पक्षलाई मिलाएर लैजान उनीहरुले सरकारलाई आग्रह गरेका थिए।
सभाध्यक्ष नेम्वाङले पीडितको उद्धारमा कुनै पनि कन्जुस्याईं नगर्न र सबै पक्षको आवश्यक सहयोग लिन आग्रह गरे। उनले राहत, उद्धार तथा पुनः स्थापनाको विषयमा संयोजक गर्न व्यवस्थापिका संसद्को राज्य व्यवस्था समितिको बैठक बोलाइएको जानकारी दिँदै जनता निर्णय होइन कार्यान्वयन चाहेको बताए।
महँगी, कालाबजारी नियन्त्रण गर्न मानवीय सेवा उपलब्ध गराउन सरकारको पहिलो ध्यान जानुपर्ने उनको भनाइ थियो । रासस
