ब्यस्थापिका संसदको सुशासन तथा अनुगमन समितिले अख्तियार दुरुपयोग अनुसन्धान आयोगको काम कारवाही अनुगमन गर्न उपसमिति गठन गरेको छ।अख्तियारका काम-कारवाही सम्वन्धमा संचार माध्यममा विभिन्न टिका टिप्पणी हुने गरेकाले यस सम्वन्धमा अध्ययन गर्न उप समिति गठन गरिएको समितिका अध्यक्ष शेरधन राईले सेतोपाटीलाई बताए।
‘अख्तियार हाम्रै सुशासन समिति अन्तर्गत नै पर्छ। अख्तियार सम्वन्धमा सञ्चार माध्यममा विभिन्न टिका टिप्पणी पढियो,’ राईले भने, ‘अख्तियारले अनावश्यक ढंगले पत्र काट्यो, कार्यक्षेत्र मिच्यो र विकास परियोजना रोक्यो भन्ने जस्ता टिप्पणी भएका छन्। यसको अध्ययन उपसमितिले गर्छ।’
समितिमा पदमनाराण चौधरी, उदय नेपाली श्रेष्ठ, जनकराज जोशी, दिलनाथ गिरी र मिलनकुमारी राजवंशी सदस्य छन्।यसअघि अख्तियारले समयमा विभिन्न जलविद्युत योजनाका अनुमतिपत्र खारेज गरेर विवादमा तानिएको थियो।चमेलिया आयोजनाको सुरूङ पुनर्निर्माण कार्यमा व्यापक अनिमियता भएको भन्दै यसअघि सरकारलाई भुक्तानी रोक्न आदेश दिँदै संसद कै लेखा समितिले उक्त भ्रष्टाचार काण्ड पनि छानविन गर्न अख्तियार कै जिम्मा लागाएको थियो।
उक्त समितिले अख्तियारले गरेको छानविनको प्रगति विवरण वुझ्न अख्तियार प्रमुख लोकमानसिंह कार्कीलाई डाक्ने पनि निर्णय गरेको छ। अख्तियारलाई साना कर्मचारीलाई कारबाही गर्ने तर ठूला भ्रष्टचारीलाई उन्मुक्ति दिँदै आएको आरोप लाग्दै आएको छ।
