एमाओवादी गठबन्धनमा आबद्ध केही राजनीतिक दलको असहमतिका कारण प्रमुख राजनीतिक दलहरुबीच तत्काल सहमति हुने सम्भावना क्षण बन्दै गएको छ।
बिहिबार अपरान्ह ३ बजेबस्ने संविधानसभाको बैठक पूर्व प्रमुख राजनीतिक दलका नेताहरु वार्तामा बसी संविधानसभाको आगामी बैठकको कार्यसूचिबारे छलफल गरी सभाध्यक्षलाई आफ्नो धारणा दिने बताइएको थियो।
तर एमाओबादी नेतृत्वमा रहेका मधेसवादी र आदिवासी जनजाति मागका पक्षधर नेताहरुसँग एमाओवादी अध्यक्ष पुष्पकमल दाहाल प्रचण्ड निवास लाजिम्पाटमा बिहान भएको अनौपचारिक छलफलमा कुरा नमिलेपछि एमाओवादी अप्ठयारोस्थितिमा परेको छ।
बैठकपछि सेतोपाटीसँग कुरा गर्दै सदभावना पार्टीका अध्यक्ष राजेन्द्र महतोले भने, ‘आज भएको अनौपचारिक छलफलमा एमाओवादी अध्यक्ष प्रचण्डजीले पछिल्लो राजनीतिक अवस्थाबारे जानकारी गराउनु भयो।’
पटक पटक आन्दोलनका कार्यक्रमहरु बीचमा फिर्ता गरेको भन्दै एमाओवादी नेतृत्वसँग रुष्ट बनेका गठबन्धनभित्रकै केही राजनीतिक दलहरुको निर्णय अनुसार आजको छलफलमा फोरम नेपालका अध्यक्ष उपेन्द्र यादव, महतो, तमलोपाका महन्थ ठाकुर, संघीय समाजवादी पार्टीका अध्यक्ष अशोक राई प्रचण्ड निवासमा पुगेका थिए।
उनीहरुले एमाओवादी नेतृत्वले आफूहरुले उठाउँदै आएका मुद्दाहरुलाई विचमा छाडि कांग्रेस र एमालेसँग सम्झौता गर्न लागेकोमा असन्तुष्टि व्यक्त गर्दै प्रमुख तीन दलबीच भएको पछिल्लो सहमतिबारे आजै अपरान्ह ४ बजे बस्ने बैठकबाट आधिकारिक धारणा बाहिर ल्याउने एक मधेसी नेताले बताए।
अहिले कांग्रेस र एमालेका अधिकांश शीर्ष नेताहरु संसद सचिवालयको राज्य व्यवस्था समितिको बैठक कक्षमा दुईपक्षिय छलफल गरिरहेपनि त्यहा एमाओवादीका नेताहरु पुगीसकेका छैनन्।
बैशाख ७ गते बालुवाटारमा सम्पन्न प्रमुख तीन दलका नेताहरुको बैठकले विगतमा सहमति भएका विषयहरु व्यवस्थापकीय अंगको स्वरुप, निर्वाचन प्रणाली र न्याय प्रणाली सहित शासकिय स्वरुपमा थप गृहकार्य गरी संविधान निर्माण प्रक्रिया अघि बढाउने र संघीयताको विषयमा सहमतिका लागि छलफल चलाउदै जाने सहमति भएको थियो।
विचको तीन दिन राजनीतिक दलका दोस्रो र तेस्रो तहका नेताहरुले अनौपचारिक र औपचारिक छलफल गरेपनि कुनै पनि विषयमा ठोस सहमति हुन सकेको थिएन। बुधबार साँझ भएको तीन दलको बैठकमा आज एमाओवादीले आफ्नो नेतृत्वमा रहेका गठबन्धनभित्र छलफल गरी संविधानसभाको बैठक पूर्व पुनः प्रमुख राजनीतिक दलका नेताहरु बैठक बस्ने बताइएको थियो।
