संविधानसभाको आजको बैठकले पूर्व प्रधानमन्त्री एवम् सभासद् सूर्यबहादुर थापाको निधनमा शोक प्रस्ताव पारित गरेको छ।
बैठकको प्रारम्भमै संविधानसभाका अध्यक्ष सुवास नेम्वाङले शोक प्रस्ताव प्रस्तुत गरेका थिए। बैठकले सो शोक प्रस्ताव सर्वसम्मतिले पारित गरेको थियो। बैठकमा दिवङ्गत नेताको आत्माको चिरशान्तिको कामना गर्दै एक मिनेट मौनधारण गरिएको थियो।
संविधानसभाको बैठकले २०५१–५६ सालको प्रतिनिधिसभा सदस्य निर्वाचनमा धनकुटा जिल्ला क्षेत्र नं २ बाट राष्ट्रिय प्रजातन्त्र पार्टीका तर्फबाट प्रत्यक्ष निर्वाचित एवम् २०७० सालको संविधानसभा निर्वाचनमा सोही पार्टीका तर्फबाट समानुपातिक सदस्य निर्वाचित भई जेष्ठ सदस्यको हैसियतले संविधानसभाको अध्यक्षता गरेका थिए।
शोक प्रस्तावमा भनिएको छ – २०१५ सालको सल्लाहकार सभाका अध्यक्ष तथा २०२१, २०२३, २०३८, २०५४ र २०६० समेत गरी पाँचपटक नेपालको प्रधानमन्त्री हुनुभएका गतिशील, निर्भिक, प्रभावशाली नेतृत्व र जुझारु व्यक्तित्वका धनी एवम् लोकतन्त्रवादी नेता सूर्यबहादुर थापाको ८८ वर्षको उमेरमा भारतको मेदान्त अस्पतालमा उपचारका क्रममा यही वैशाख २ गते असामयिक निधन भएकामा गहिरो शोक प्रकट गर्दछ र उहाँको दिवङ्गत आत्माको चिरशान्तिको कामना गर्दै शोक सन्तप्त परिवारप्रति समवेदना प्रकट गर्दछ।
संविधानसभाका यसअघिका दुई वटा बैठकसमेत शोक प्रस्ताव पारित गर्दै स्थगन भएको थियो। नेकपा(एमाले)का सभासद् रामनाथ ढकाल र एकीकृत नेकपा(माओवादी)का नेता सलिममियाँ अन्सारीको सम्मानमा गत चैत २३ गते र ३० गतेको बैठक शोक प्रस्ताव पारित गर्दै स्थगन गरिएको थियो।
संविधानसभाको अर्को बैठक यही वैशाख १० गते बिहीबार अपराह्न ३ बजे बस्ने कार्यक्रम छ। रासस
