पूर्वप्रधानमन्त्री तथा एमाओवादी नेता बाबुराम भट्टराईले पूर्वराजा ज्ञानेन्द्रको देश दौडाहा संविधानसभा चुनाव भाँड्ने उद्देश्यले भएकाले उनलाई जेल हाल्नुपर्ने बताएका छन्।
मंगलबार सानेपास्थित आफ्नै निवासमा सञ्चारकर्मीहरुसँग कुरा गर्दै भट्टराईले पूर्वराजा ज्ञानेन्द्रको बाहिरी रुप जस्तो देखिए पनि भित्री रुपमा उनको भ्रमणको राजनीतिक उद्देश्य रहेको बताए। 'ज्ञानेन्द्रले चुनावविरोधी गतिविधि गरिरहेका छन्,' उनले भने, 'म भए थुन्दिन्थेँ।'
नेकपा–माओवादीका अध्यक्ष मोहन बैद्य र बिपी पुत्र सशांक कोइरालासहितको टोलीले राष्ट्रियताको सवालमा पूर्वराजा तथा पञ्चहरुसँग सहकार्य गर्ने अभिव्यक्तिप्रति आपत्ति जनाउँदै उनले भने, 'पञ्चहरुसँग सहकार्यको कुरा उठेको छ, यो गणतन्त्र, धर्म निरपेक्षता, संघीयताविरुद्धको षड्यन्त्र हो।' राष्ट्रियताको सवालमा पूर्व राजासँग सहकार्य गर्छु भन्नु उल्टो बुद्धि भएको उनले टिप्पणी गरे ।
आफू र आफ्नो पार्टी राष्ट्रवादी भएको दाबी गर्दै भट्टराईले आवश्यकता परे आफूहरु सुरुङ युद्ध गर्ने पनि बताए । माओवादीले राष्ट्रियताको मुद्दा नछोडेको बताउँदै उनले भने,'युद्धकालमा पनि हामीले राष्ट्रियताको पक्षमा सुरुङ युद्ध गर्न खोजेका थियौं, आवाश्यक पर्यो भने फेरि पनि गर्न तयार छौं।'