एमाओवादी नेतृत्वमा रहेको ३० दलीय मोर्चाले चर्को आन्तरिक विवादका बाबजुद भोलि र पर्सिको आमहडताल फिर्ता लिएको छ। पहिलो दिनको आमहडतालको समिक्षा गर्न सिंहदरबारमा मंगलबार साँझ बसेको बैठकको सुरुमा एमाओवादी अध्यक्ष पुष्पकमल दाहाल प्रचण्डले देशभर बन्द सफल भएको भन्दै त्यसका लागि सम्बन्धित सबैलाई धन्यवाद दिएका थिए।
आफूलाई सर्वसाधारण जनता, उद्योग व्यापारी लगायतको चौतर्फी दबाब आइरहेको जानकारी बैठकमा गराउँदै उनले सत्तापक्षले प्रक्रिया अघि बढाउने कुनै कार्यसूचीबिनै चैत ३० गतेका लागि संविधानसभाको बैठक डाकेको अवस्थामा आमहडतालको औचित्य नभएकाले फिर्ता लिने प्रस्ताव राखेका थिए।
उनको प्रस्तावमा मधेसी जनअधिकार फोरम लोकतान्त्रिकका अध्यक्ष विजयकुमार गच्छदार, तमलोपाका अध्यक्ष महन्थ ठाकुरलगायत अधिकांश साना राजनीतिक दलले समर्थन जनाउँदै भोलि र पर्सिको बन्द फिर्ता लिनुपर्ने राय दिएका थिए।
प्रचण्डको प्रस्तावको विरोध गर्दै जनजाति नेता पासाङ शेर्पाले सत्तापक्ष सहमतिका लागि तयार नभएको अवस्थामा आमहड्ताल निरन्तर जारी राख्नु पर्ने अडान राखेका थिए। उनको प्रस्तावलाई फोरम नेपालका अध्यक्ष उपेन्द्र यादव र जनमुक्ति पार्टीका नेताले पनि समर्थन जनाएका थिए । अर्का जनजाति दलका नेता पर्शुराम तामाङले भोलि नभई पर्सिको आमहडताल फिर्ता लिन सकिने प्रस्ताव राखेका थिए।
‘झण्डै दुईघण्टा लामो बैठकमा आमहडतालको विपक्षमा रहेका दलका नेताहरूले सभाध्यक्षले संविधानसभाको बैठकको कार्यसूचीबिना ३० गते बैठक डाकी प्रक्रियामा अघि बढ्छु पनि नभनेको अवस्थामा बाँकी दुईदिनको आमहडतालको औचित्य पुष्टि गर्न चुनौती दिएका थिए,’ खुम्बुवान राष्ट्रिय मोर्चा नेपालका रामकुमार राइले बताए, ‘तर, आमहडताल जारी राख्ने प्रस्तावको पक्षमा रहेका दलका नेताहरूले औचित्य पुष्टि गर्न नसकेपछि प्रचण्डलगायत नेताहरूको प्रस्तावमा सबै सहमति भएका हौं।’
राईका अनुसार चैत ३० गतेको संविधानसभाको बैठक कसरी अघि बढ्छ, त्यसैका आधारमा आगामी आन्दोलनको कार्यक्रमको स्वरूप तय हुनेछ ।
गठबन्धनका प्रवक्ता प्रेमबहादुर सिंहले भने आम जनता, उद्योगी र व्यापारीलगायत जनताबाट भएको आग्रह अनुसार आमहड्तालको कार्यक्रम फिर्ता लिएको बताएका छन्। उनले गठबन्धनको आगामी आन्दोलनका कार्यक्रमबारे चैत २७ गते बस्ने बैठकले तय गर्ने छ।
आजको बैठकले आमहडताल दबाउन भएको सरकारी दमनको भर्त्सना गर्दै पक्राउ परेका सबै नेता कार्यकर्ताको तत्काल रिहाइको माग गरेको छ।
