सञ्चारकर्मीको जिज्ञासाको ‘सटिक’ जवाफ दिने काँग्रेस वरिष्ठ नेता शेरबहादुर देउवाको पूरानै स्वभाव हो ।
उनी पत्रकार सम्मेलनमा सञ्चारकर्मीले सोधेका कुराको जवाफ हो, होईन, भन्छु, भन्दैन, गर्छु, गर्दैन, छ, छैन यस्तैयस्तै शब्दमा नै टुङ्ग्याईदिन्छन् ।
देउवाको मुखबाट समाचारको ‘क्लु’ फुस्केला भन्ने सञ्चारकर्मीले आश गरेका बेला यस्तैयस्तै एक÷दुई शब्दमै चित्त बुझाउनु पर्छ । उनी पत्रकार सम्मेलनमा हतारो गरिरहन्छन् ।
सञ्चारकर्मी पनि देउवाको मुखबाट समाचारको उठान हुने दमदार ‘क्लु’ नभेटेपछि निरास हुँदै पत्रकार सम्मेलन टुङ्ग्याउनेतिर लाग्छन् ।
नेपाल प्रेस युनियन कैलालीले आज धनगढीमा आयोजना गरेको पत्रकार सम्मेलनमा भने देउवा अलि गफिन खोजे ।
पत्रकार सम्मेलनको सभापतित्व गरेका युनियनका अध्यक्ष टेकराज जोशीले सहभागीताका लागि धन्यवाद भन्दै गर्दा देउवाले रोके । हिड्नै खोजेका सञ्चारकर्मीलाई आफ्नो कुरा सुन्न आग्रह गरे ।
पत्रकार सम्मेलन भैरहेको कोठाबाट बाहिर निस्कदै गरेकाहरु फर्किए । उठ्ने तयारीमा रहेकाहरु पनि बसे । देउवाले आफै बोल्ने इच्छा व्यक्त गरेपछि सबै सञ्चारकर्मीले कान तेस्र्याए ।
देउवाले कुनै नयाँ कुरा बोल्ने भए भन्दै हौसिएका सञ्चारकर्मीहरु त्यतिबेला जिल्लिए जब उनले आफ्नो पूरानै कुरा दोहो¥याए ।
उनले सञ्चारकर्मी सामु आफैले राख्न खोजेको कुरा थियो ‘संघीय संरचनामा सुदूरपश्चिम अखण्ड रहने ।’ जुन कुरा देउवाले सुरुदेखि नै भन्दै आएका छन् ।
‘अघिल्लो संविधान सभामै तीन दलका शिर्ष नेताहरुबीच लिखित सहमति भैसकेको कुरा अब पनि त्यही हुन्छ’ उनले भने–‘बरु राना थारुलाई अलग्गै सूचिकृत र डगौरा थारुलाई विशेषाधिकार कसरी दिन सकिन्छ भन्ने बारेमा सोचौं ।’
उनले भने–‘राना थारु यहीको बासिन्दा हो । दाङबाट आएका र हामी पहाडबाट आएकाहरुले मिलेर बस्नुपर्छ ।’
उनले यति भनिसके पछि सञ्चारकर्मी टेकराज अवस्थीले सोधे ‘सुदूरपश्चिम टुक्रिदैन भन्न खोज्नु भएको हो ?’ उठेर हिड्दै गरेका देउवाले फेरि उही शैलीमा जवाफ फर्काए ‘तपाई के भन्नुहुन्छ भन्नुस् न ?’
पत्रकार सम्मेलनमा देउवासँग सञ्चारकर्मीका धेरै जिज्ञासा थिए । उनीहरुले क्रमिक रुपमा राखे । सबैभन्दा महत्वपूर्ण कुरा त कैलाली काँग्रेसमा गठन भएको समानान्तर समिति थियो ।
संस्थापन पक्षले कैलाली काँग्रेस सभापति नरनारायण शाह मनुले आफू खुशी पार्टी चलाएको भन्दै समानान्तर समिति गठन गरेको छ । यो कुराका बारेमा सञ्चारकर्मी देउवाकै मुखबाट प्रतिक्रिया सुन्न चाहन्थे ।
तर देउवाले यस बारेमा आफूले बुझ्न नपाएको बताए । ‘म यहाँ केही भन्न चाहन्न । साथीभाईहरुबीच के भएको रहेछ’ उनले भने–‘मेलमिलाप गरेर अघि बढ्नु पर्छ । समस्याको समाधान गर्नुपर्छ ।’
सञ्चारकर्मी दीलबहादुर छत्यालले सोधे ‘तपाईको उम्मेदवारी घोषणा भएको हो ।’ देउवाको ठट्यौली जवाफ थियो ‘भएपछि तपाईलाई भनि हाल्छु नि ।’
‘आफ्नो क्षेत्रमा हुनुहुन्छ । यो एउटा अवसर पनि हो । यहीबाट घोषणा गर्दा हुँदैन’ छत्यालले समाचारको ‘क्लु’ फुत्काउने प्रयत्न गरे । देउवाले भने–‘सरसल्लाह गरेर भन्छु ।’
संविधान सभा निर्वाचनमा कैलाली क्षेत्र नम्बर ६ बाट उम्मेदवार भएका बेला देउवाले प्राथमिकतामा राखेको भनेको कैलालीको खुटिया हुँदै डोटीको दिपायल जोड्ने ‘फास्ट ट्रयाक’ का बारेमा मैले सोधे ‘काम अघि बढ्नै सकेन, भैरहेको काम पनि
रोकियो ?’ उनले भने–‘बढ्छ किन चिन्तामा बस्नुहुन्छ ।’
संविधान सभा निर्वाचनमा देउवाको प्रमुख एजेण्डा रहेको ‘फास्ट ट्रयाक’ बारेमा जनताले जान्न चाहेको धेरै बाँकी नै थियो । मैले केही समयपछि त्यही जिज्ञासा दोहो¥याउँदै भने ‘यस बारेमा तपाईका मतदाताले धेरै जान्न चाहेका छन् ।’
उनले भने–‘मलाई पनि दुःख लागेको छ । कहाँ अड्किएको रहेछ काठमाण्डौं गएर म बुझ्छु ।’
गेटामा निर्माण हुने भनिएको मेडिकल कलेज पनि देउवाको प्राथमिकता अन्र्तगत हो । केही दिन अघि मात्रै पनि उनले धनगढीमा आयोजित पत्रकार सम्मेलनमा काठमाण्डौं फर्किएर काम रोकिएको बारेमा बुझ्ने भनेका थिए ।
यो विषयलाई पनि सञ्चारकर्मीले छुटाउने कुरै थिएन । सञ्चारकर्मी दीपक जोशीले स्मरण गराएपछि उनले भने–‘सबैभन्दा खुशीको कुरा तारवार लागिसकेको छ । वालहरु बनिसकेको छ ।’
उनले स्थानीय बासिन्दाको मेडिकल कलेजलाई प्रतिष्ठान नै बनाउनु पर्ने मागले कानूनी झण्झट भएको बताए । त्यसका लागि विधेयक मार्फत ऐन ल्याउनुपर्ने देउवाको भनाई थियो ।
उनले संविधान सभाको काम अघि बढिसकेकाले संविधान निर्माणको काम आन्दोलनले प्रभावित नहुने बताए । उनले सकेसम्म सहमति र नत्र प्रकृयामा गएर भएपनि संविधान जारी हुने बताए ।