मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदारले विपक्षी गठबन्धनको मोर्चाले संविधानसभा छाड्न नहुने बताएका छन् ।
बिहान विराटनगर विमानस्थलमा पत्रकारहरुसँग कुरा गर्दै अध्यक्ष गच्छदारले संविधानसभा छाडेर सडकमा जाँदैमा उपलब्धि हात नलाग्ने भएकाले संविधानसभा छाड्न हुँदैन भने ।
उनले संविधानसभाबाटै संविधान बनाउनुपर्छ र देशमा जारी गतिरोध अन्त्य गर्नुपर्नेमा जोड दिँदै आफूहरुलाई नेपाली जनताले संविधान निर्माण गर्न चुनेर संविधानसभामा पठाएकाले संविधानसभा छाड्नु भनेको जनताको मतलाई अपमान गर्नु हो भने ।
उनले संविधानसभा छाड्दैमा राजनीतिक गतिरोध अन्त्य नहुने उल्लेख गर्दै संविधानसभा असफल भए सबै राजनीतिक दल असफल हुने बताए ।
अध्यक्ष गच्छदारले सत्तारुढ र विपक्षी मोर्चाको हठले देशलाई मुठभेडमा लानसक्ने भएकाले आमहडताल गरेर जनतालाई दुःख दिनुभन्दा वार्ताबाट समस्या समाधान गर्नुपर्छ भने । रासस
प्रकाशित मिति: 2015-04-01 14:11:27
