दिल्ली विधानसभामा ७० सिट मध्ये ६७ सिट जितेर सत्तामा आएको आम आदमी पार्टी (आप) गहिरो संकटमा परेको छ।
वैकल्पिक शक्तिको रूपमा उदाएको सो पार्टीको आन्तरिक विवादले दिल्लीमात्र होइन भारतीय मिडियामा ठूलो स्थान पाएको छ। नेताहरुका गोप्य टेपहरु सार्वजनिक भएका छन्। दिल्लीका मुख्यमन्त्री तथा आपका राष्ट्रिय संयोजक अरबिन्द केजरिवालविरुद्ध उभिएका संस्थापक मध्येका दुई नेता योगेन्द्र यादव र प्रशान्त भुषणलाई पार्टीले कारबाही गरेको छ। दुबै नेतालाई राष्ट्रिय कार्यकारणी बैठकले जिम्मेवारीविहिन बनाएको छ।
जिम्मेवारबिहिन बनेका नेता योगेन्द्र यादवले भने अरबिन्द केजरिवालमा नेतृत्व क्षमता भएकाले आफू उनको सधैँ प्रसंशक, साथी र शुभेच्छुक रहिरहने बताएका छन्। सिएनएन– आइबिएन च्यानलसँगको अन्तर्वार्तामा यादवले केजरिवाललाई पार्टीमा फरक मतको सम्मान गर्न पनि सुझाएका छन्।
उनले दिल्लीका जनतालाई सुशासन दिनपनि आग्रह गरेका छन्। सबैभन्दा बढी उनले आलोचना सुन्ने र सहन सक्ने बानी बसाउन सुझाव दिएका छन्।
उनले पार्टी नछोडने पनि प्रष्ट पारेका छन्। ‘कार्यकर्तामात्र भएर पनि पार्टीको सदस्य हुनुमा गर्व छ’, उनले भनेका छन्।
प्रशान्त र यादवले आगामी अप्रिल १४ मा आफ्ना समर्थकको भेला डाकेका छन्। सो भेलाले पार्टीका मूल्य मान्यतालाई शसक्त बनाउन दबाब दिने उनीहरुले अपेक्षा गरेका छन्।