प्रधानमन्त्री सुशील कोइरालाले डा. गोविन्द केसीको स्वास्थ्य स्थितिबारे मिडियामा आएको समाचार सत्य नभएको नागरिक अगुवाहरूले बताएका छन्।
सोमबार प्रधानमन्त्री निवास वालुवाटारमा पुगेर प्रधानमन्त्रीलाई ध्यानाकर्षण पत्र बुझाउँदै ‘प्रधानमन्त्रीले त्यस्तो गैरजिम्मेवारीपूर्ण शब्द र वाक्य प्रयोग गर्नु भएकै होईन। डा. केसीको जीवनलाई केही भईहाल्यो भने के गर्ने? भनेर प्रधानमन्त्रीबाट चिन्ता ब्यक्त भएको हो। यस भनाईको आशयलाई अन्यथा समाचार बनेकोमा त्यस पत्रिकालाई सच्याउँन अनुरोध गरेका छौ,’ ध्यानाकर्षण पत्रमा भनिएको छ।
ध्यानाकर्षण पत्रको पूर्ण पाठ यस्तो छ।
ध्यानाकर्षण
डा.गोविन्द केसीको स्वास्थ्य स्थितिबारे चिन्ता गरेर कुरागर्न गएका नागरिक समाजलाई ‘प्रधानमन्त्रीले भने– डा. केसी मरे म के गरौं त?' भनेर एक राष्ट्रिय दैनिकमा चैत्र १४ प्रमुख समाचार र १५ गते सम्पादकीय समेत छापीएकोमा हाम्रो गम्भीर ध्यानाकर्षण भएको जानकारी गराउँन चहान्छौं।
उक्त भेटघाटमा प्रधानमन्त्रीले त्यस्तो गैरजिम्मेवारीपूर्ण शब्द र वाक्य प्रयोग गर्नु भएकै होईन। डा. केसीको जीवनलाई केही भईहाल्यो भने के गर्ने? भनेर प्रधानमन्त्रीबाट चिन्ता ब्यक्त भएको हो। यस भनाईको आशयलाई अन्यथा समाचार बनेकोमा त्यस पत्रिकालाई सच्याउँन अनुरोध गरेका छौ। उक्त जिम्मेवार र गरिमामय राष्ट्रिय दैनिकले यस्तो संबेदनशील विषयलाई लिएर समाचारको वास्तविकता पुष्टि नगरी उल्टो अर्थ लाग्ने गरेर समाचार संप्रेषण भएकोमा हामीले दुःख ब्यक्त गरेका छौं।
उक्त भेटघाटमा सहभागी नभएका ब्यक्ति दिलेन्द्रप्रसाद बडुको नाम समेत त्यस समाचारमा उल्लेख भएबाट पनि यसको विश्वसनीयतामा प्रश्न उठेको कुरा हिजो हामीले सम्पादकलाई पठाएको चिठीमा बताएका छौं।
तपसिलः
डा. केदारनरसिंह केसी, सुबोधराज प्याकुरेल, कपील श्रेष्ठ, कनकमणि दिक्षीत र चरण प्रसाई।
