लाचार प्रधानमन्त्रीको कारण मुलुकको नागरिक भन्नुपर्दा आफूले लज्जाबोध हुने गरेको राष्ट्रिय मधेस समाजवादी पार्टीका अध्यक्ष शरतसिंह भण्डारीले बताएका छन्।
अरूको दबाबमा काम गरेको र आफ्नै मन्त्रीहरु भ्रष्टाचारमा संलग्न रहेको प्रधानमन्त्रीको स्वीकारोक्तिले सरकार लाचार रहेको प्रमाणीत भएको उनले बताए।
पार्टीको भातृ संगठन समाजवादी युवा लिगको वीरगंजमा सम्पन्न केन्द्रीय विस्तारीत बैठकलाई सम्बोधन गर्दै अध्यक्ष भण्डारीले आफूहरु सहमतिकै पक्षमा रहेको उल्लेख गरे। यद्यपि कांग्रेस एमालेले दुई तिहाइ बहुमतको दम्भ देखाएर घोषणापत्रलाई नै संविधानको रुपमा जारी गर्न खोजेको टिप्पणी समेत गरे।
अध्यक्ष भण्डारीले सरकारमा रहेका कांग्रेस र एमालेलाई जनताको अदालतमा ठगी, अपहरण र राष्ट्रद्रोहको मुद्दा हाल्न नपरोस भने चेतावनी दिँदै नेकपा माओवादी, मधेसी, आदिवासी जनजाती, दलित, मुस्लिम लगायत पिछडिएको बर्गसँग गरेको सम्पूर्ण सहमती र सम्झौतालाई गरेकै छैन भन्नु जनतालाई ठग्नु भएको बताए।
यस्तै संघीयताको सवालमा झापा, मोरङ, सुनसरी, कैलालि र कन्चनपुरलाई मधेस प्रदेशमा राख्नै नहुने भनेर अडि्डका कारण पहाडी र मधेसी समुदायबीच सरकारमा रहेका दलहरुले फुट ल्याउनु राष्ट्रद्रोहको काम भएको जिकिर समेत गरेका थिए।
युवा लिगको केन्द्रीय विस्तारीत बैठकमा सहभागी हुन आएका अध्यक्ष भण्डारीले चुरे जोगाऔँ, मधेस बचाऔं भन्ने नारालाई देशव्यापी अभियानको रूपमा सन्चालन गर्न आग्रह गरे।
अध्यक्ष भण्डारीले सरकारको द्धैध चरित्रको भण्डाफोर गर्न समेत युवाहरुलाई निर्देशन दिँदै सरकारले सेवाकेन्द्रको नाममा संघीयताको विरुद्धमा चलखेल गरेको बताएका थिए।