एकीकृत माओवादीका नेता डा. बाबुराम भट्टराईले ३० दलीय मोर्चाको आन्दोलनको मनसाय सशस्त्र विद्रोह गर्ने र राज्यसत्ता पल्टाउने नभएको बताएका छन्। एकीकृत माओवादी कास्कीले शुक्रबार पोखरामा आयोजना गरेको सहमतीय संविधान निर्माणमा जनआन्दोलनको भूमिका विषयक अन्तरक्रिया कार्यक्रममा बोल्दै नेता भट्टराईले भने, ‘अहिलेको आन्दोलको उद्देश्य सहमतिमा संविधान बनाउने हो।’
पूर्व प्रधानमन्त्री समेत रहेका भट्टराईले अहिले आफूहरूलाई सत्ता आवश्यक पनि छैन, र सम्भव पनि नरहेको प्रतिक्रिया दिए।
उनले गणतन्त्र, संघीयता, धर्म निरपेक्षता र समावेशीका विषयमा सहमति भए बाँकि विषयहरु संविधासभामा मतदानमार्फत नै टुंग्याउन आफूहरु तयार रहेको बताए। उनले कांग्रेस, एमाले र एमाओवादी सहितका ३० दलीय मोर्चा चार विषयमा सहमति भए प्रक्रिया मै जान सकिने बताए। उनले सत्तापक्षले विधी र प्रक्रिया समाएर बस्ने, हामीले अन्तरबस्तुमात्र समाएर बस्दा सहमति हुनै नस्कने ठोकुवा समेत गरे।
उनले सत्तापक्षले १२ बुँदे सहमति, जनआन्दोलन र पटकपटक भएका सहमति विपरित बहुमतको दम्भ देखाएकोले आन्दोलन गर्नुपरेको उनको भनाई थियो। उनले १२ बुँदैजस्तै सम्झौता गरी गतिरोध अन्त्य गर्न सत्तापक्षसँग आग्रह पनि गरे। जनआन्दोलनको जनादेश र क्रान्तिको मतादेशको कदर गर्न आफूहरु तयार रहेको बताउँदै उनले सत्तापक्ष लचिलो भए सहमति टाढा नभएको उनको भनाई थियो।
