एकीकृत नेकपा (माओवादी)का बरिष्ठ नेता डा. बाबुराम भट्टराईले आफूहरु युद्धको पक्षमा नभए पनि जनताको हक–अधिकार खोसिएको टुलुटुलु हेरेर बस्न नसक्ने स्पष्ट पारेका छन्। भारतको मुम्बईमा अखिल भारत नेपाली एकता मञ्चको एकताको सातौं राष्ट्रिय सम्मेलनको समापन समारोहलाई सम्बोधन गर्दै नेता भट्टराईले भने– ‘हामी अब युद्ध र लडाईंको पक्षमा छैनौं तर जनताको हक–अधिकार हाम्रै अगाडि खोसिएको, अपहरण भएको टुलुटुलु हेरेर बस्न सक्दैनौं।’
‘शान्तिको झण्डा हामीले उठाउँदै गर्दा हाम्रो लचकतालाई कमजोरी ठानिन्छ भने क्रान्तिको झण्डा हामी उठाउन बाध्य हुनेछौं । त्यो क्रान्तिले नै जनताका हक र अधिकार सुनिश्चित गर्नेछ’, उनले भने। १०–वर्षे जनयुद्ध नेपाली इतिहासको ठूलो उपलब्धी भएको र यसप्रति आफूलाई गर्व भएको पनि उनले बताए।
‘राजतन्त्र अन्त्य भयो तर केही मान्छेहरु आफूलाई नयाँ छोटे राजाको रुपमा उभ्याउन खोजेकोले सहमति जुट्न सकेको छैन । छोटे राजाहरु शान्ति सम्झौता तोड्न उद्यत छन्’, उनले भने– ‘छिटो भन्दा छिटो सार्थक वार्ताको माध्यमबाट संविधानसभाबाटै जनता बलियो हुने गरी अधिकार सहितको संविधान बनोस भन्ने हामी चाहन्छौं । यसको निम्ति हामीले विगत १० महिना दिनरात नभनी धेरै पहल गर्यौं । सहमति होस भनेर हामी धेरै लचिलो बन्यौं । अझै पनि हामी सहमतिबाटै हिजोका सहमति–सम्झौता अनुसारकै संविधान बनोस भन्ने चाहन्छौं ।’
क्रान्ति अझै नसिद्धिएको उल्लेख गर्दै उनले श्रमिक वर्गले जनपक्षीय संविधान र शासन सत्ता आफ्नो हातमा नलिँदासम्म क्रान्ति निरन्तर जारी रहने पनि बताए। उनले भने, ‘हिजोका हाम्रा सबै कमी–कमजोरीबाट पाठ सिकेर सिंगो पार्टीलाई एकताबद्ध बनाउँदै अग्रगमनकारी परिवर्तनकारी शक्तिहरुलाई पनि साथ लिएर अघि बढ्नुको विकल्प अब हामीसँग छैन ।’
