उद्योगमन्त्री महेश बस्नेतले व्यवसायीलाई बन्दको विपक्षमा लाग्न आग्रह गरेका छन्।
युवा उद्यमशीलता तालिमका सहभागीलाई शनिबार भक्तपुरमा प्रमाणपत्र वितरण गर्दै उनले युवा, व्यवसायी कोही पनि बन्दको पक्षमा नभएकाले आन्दोलनको नाममा गरिने सबैखाले बन्दको विपक्षमा उभिनुपर्नेमा जोड दिए।
मन्त्री बस्नेतले युवालाई स्वदेशमै अवसर र रोजगारको व्यवस्था गर्न सरकार सधैँ क्रियाशील छ भन्दै नेपाली युवाले विदेशमा जस्तो पनि काम गर्ने तर स्वदेशमा बसेर काम गर्न लाज मान्ने प्रवृत्ति त्याग्नुपर्नेमा जोड दिए। घरेलु तथा साना उद्योगलाई प्राथमिकता दिनुपर्ने औँल्याउँदै उनले स्वदेशी उत्पादनलाई अगाडि बढाउने गरी सरकारले नीति ल्याउन लागेको जानकारी दिए। रासस
