राष्ट्रिय प्रजातन्त्र पार्टीका अध्यक्ष पशुपति शमसेर जवराले पूर्वराजा ज्ञानेन्द्रले भन्ने गरेझै केहि न केहि सहमति भएको कुरा सत्य भएको बताएका छन्।
रिपोटर्स क्लव दाङले शुक्रवार दाङको तुल्सीपुरमा आयोजना गरेको पत्रकार सम्मेलनमा बोल्दै राप्रपा अध्यक्ष जवराले पूर्वराजाले समय समयमा भन्ने गरेको सहमतिका बारेमा औपचारिक जानकारी नभएपनि कुनै न कुनै रुपमा सहमति भने भएको दावी गरेका हुन्।
भारतीय नेता करण सिंह नेपाल आउँदा उक्त सहमति भएको पनि उनले प्रष्ट्याए। अन्यथा किन पूर्व राजाले पटक/पटक त्यही कुरा वोल्दा समेत दलहरुले स्पष्ट जवाफ दिन सक्दैनन्। दलभित्रैका कतिपय नेताहरुले समेत सहमति भएको बताउने गर्नुबाट समेत त्यसको पुष्टि हुने उनले जिकिर गरे।
त्यस्तै उनले आफूहरू हिन्दु राष्ट्रका पक्षमा रहेको बताए। धार्मिक स्वतन्त्रता सहितको गणतान्त्रिक हिन्दु राज्य हुनुपर्ने उनको माग छ। पार्टीको अब बस्ने केन्द्रीय समितिको वैठकबाट यो विषयमा आधिकारीक धारणा सार्वजनिक गर्ने पनि जवराले खुलाए।
त्यसैगरी उनले वर्तमान सरकार गएको माघ ८ मा संविधान जारि गर्न सफल नभएपनि वैदेशिक लगानी भित्र्याउन भने सफल भएको टिप्पनि गरे। वर्तमान सरकाले अन्य सरकारको तुलनामा जलश्रोत, उद्योग, पर्यटन जस्ता क्षेत्रमा थुप्रै लगानी भित्र्याउन सफल भएको भन्दै उनले प्रशंशासमेत गरेका थिए। नयाँ संविधान जारि गर्ने सवालमा केहि मुद्धाहरुमा सहमति जुट्न नसके पनि सहमतिको वातावरण भने वन्दै गईरहेको उनको भनाई थियो।
उनले सहमतिका लागि राजनीतिक दलहरुलाई आवश्यक्ता अनुसार समय दिईनुपर्ने समेत धारणा राखे। उनले भने ‘प्रचण्डहरुपनि शनिबारपछि वार्तामा आउने वातावरण निर्माण हुन्छ।’
