विराटनगर विमानस्थलमा देउवाको स्वागत गरिँदै। तस्बिर : खिलानाथ/सेतोपाटी
नेपाली कांग्रेसका बरिष्ठ नेता शेरबहादुर देउवाले सभापति उम्मेदवारीका लागि ‘बेला आएपछि भन्ने' बताएका छन्। सहमतिमा नेतृत्व हस्तान्तरण नहुने भन्दै नेता देउवाले सभापतिमा आफ्नो इच्छा देखाएका हुन्।
विराटनगर विमानस्थलमा बिहीबार संवाददाताहरूसँग कुरा गर्दै देउवाले भने, ‘सभापतिमा मेरो उम्मेदवारीबारे समय आएपछि तपाईंहरूलाई भन्छु।'
आन्तरिक सहमतिमा सभापति सुशील कोइरालालाई पुनः नेतृत्व दिने हो? भन्ने जिज्ञासामा देउवाले ‘त्यस्तो हैन' भनेका छन्। महाधिवेशन जसरी पनि हुने भन्दै उनले भ्रातृ संस्थाहरूको अधिवेशन चाँडै हुने बताएका छन्।
पार्टी महाधिवेशनको मिति तय भएपछि नेताहरू विराटनगर आउने क्रम तीब्र भइरहेको छ। नेपाल दुग्ध व्यवसायी संघको केन्द्रीय अधिवेशन उद्घाटन गर्न आएका देउवाले बिहीबारै जिल्ला पार्टीको कार्यालयमा कार्यकर्ता भेटघाटको कार्यक्रम राखेका छन्।
आफ्नो पक्षमा माहोल बनाउन केन्द्रीय सदस्य सुजाता कोइराला, सशांक कोइराला यसअघि विराटनगर आएर छलफल गरिसकेका छन्। स्थानीय नेता कार्यकर्ताका अनुसार आसन्न महाधिवेशनमा प्रतिनिधि छनोट प्रक्रिया सजिलो नभएकाले नेताहरू दौडधुपमा लागेका छन्।
‘राजधानीबाहिर विराटनगरबाट सबैभन्दा बढी प्रतिनिधि जाने भएकाले नेताहरूको चासो बढेको हो,' जिल्लास्तरीय एक नेताले भने। यसपालिको महाधिवेशनका लागि एक क्षेत्रबाट १२ जना प्रतिनिधि छानिनेछन्। मोरङका ९ वटा क्षेत्रबाट १ सय ८ प्रतिनिधि छानिँदैछन्। जसमा पाँच महासमिति सदस्य, क्षेत्रीय सभापति र ५ जना प्रतिनिधि गरेर १२ जनालाई एक क्षेत्रबाट लगिने छ।
महाधिवेशन प्रतिनिधि छनोटका लागि वडा समितिबाट चुनिएर क्षेत्रीय समितिमा पुर्याइन्छ। क्षेत्रीय समितिमा सहमति भए सहमतिबाट नभए चुनावबाट प्रतिनिधि छान्ने प्रावधान राखिएको छ, पार्टी जिल्ला समितिलाई सिधै महाधिवेशन प्रतिनिधि छान्ने अधिकार छैन।
संविधान निर्माणमा देखिएको अन्योलबारे माओवादीसँग पार्टीहरूको छलफल भइरहेको भन्दै देउवाले सहमति हुने विश्वास व्यक्त गरे। सहमति नभए प्रक्रियामा पूर्ववत प्रयास जारी रहने देउवाले बताएका छन्।
‘सहमति नभए प्रक्रियामा जाने हो,' देउवाले भने। एमाओवादीको पछिल्लो आन्दोलनले संविधान निर्माण प्रक्रियामा असर नगर्ने उनले बताए।
‘बन्दुकले त भएन, लाठीले के हुन्छ?,' उनले भने, ‘एमाओवादीसँग प्रधानमन्त्री आफैंले वार्ता गरिरहनुभएको छ।'
राज्य पुनःसंरचनामा देखिएको विवाद सहमतिबाट नै अघि बढ्ने उनले बताए। ‘सहमतिमा जाने या जनमतसंग्रह हुने भन्ने कुरा सल्लाहमा हुने हो,' देउवाले भने।