लोकसेवा आयोग लगायतका अन्य दुई संबैधानिक निकायमा रिक्त रहेका पदाधिकारीहरुको नियुक्तिको सिफारिस गर्न संबैधानिक परिषदकेा बैठक आज साँझ बस्दै छ।
प्रधानमन्त्री एवम् परिषदका अध्यक्ष सुशील कोइरालाले फागुन ४ गतेबाट पदाधिकारी बिहिन भएको लोकसेवा आयोगमा कांग्रेस निकट पूर्व सचिव उमेश मैनालीलाई नियुक्त गर्ने तयारीका साथ फागुन १ गते बैठक डाकेका थिए।
तर परिषदका अन्य सदस्यहरुले लोकसेवाका अतिरिक्त अख्तियार दुरुपयोग अनुसन्धान आयोग र निर्वाचन आयोगमा पनि रिक्त रहेका पदमा पदपूर्तिकेा सिफारिस एक साथ तत्काल गर्नु पर्ने प्रस्ताव राखेपछि मंगलबार बसेको बैठकले परिषद ऐन अनुसार पदपूर्तिको सिफारिस गर्न आज साझ ५ बजेका लागि बैठक तय भएको हो।
लोकसेवा आयोगमा एमाओवादी नेता बाबुराम भट्टराईकी जेठी दिदी सासु कयोदेवी यमीको पदावधि सकिए पनि परिषद सदस्य एवम् एमाओवादी अध्यक्ष पुष्पकमल दाहालले उनैलाई निरन्तरता दिन प्रस्ताव मंगलबारको बैठकमा राखेका थिए।
तर पूर्वसचिव मैनालीलाई आयोग अध्यक्षमा सिफारिस गर्ने प्रस्ताव प्रधानमन्त्री कोइरालाले राखेपछि उक्त बैठकमा कुनै सहमति हुन सकेको थिएन।
त्यसपछि परिषद सदस्य एवम सभामुख सुवासचन्द्र नेम्वाङले परिषद ऐनले व्यवस्था गरे अनुसार आजको लागि बैठक र बैठकमा पेश हुने प्रस्ताव प्रष्ट उल्लेख गर्न सुझाव दिए अनुसार अस्तिको बैठक स्थगित भएको थियो।
परिषद ऐनकेा दफा ७ अनुसार, संबैधानिक निकायमा नियुक्तिका लागि बसेको पहिलो बैठकमा पेश भएकेा प्रस्तावमा सर्वसम्मतिले निर्णय हुन नसकेमा अर्को बैठक बसी सकेसम्म सहमति र नभएमा उपस्थित सदस्यहरुकेा बहुमतको निर्णयले पदपूर्तिको सिफारिस गर्न सक्ने व्यवस्था छ।
विगतमा संबैधानिक परिषदको बैठकमा ऐनमा व्यवस्था भएबमोजिम प्रक्रिया पूरा नगर्दा कतिपय परिषदका निर्णयहरु सर्वोच्च अदालतले बदर गरेको घटनालाई मध्यनजर गर्दै मंगलबारको बैठकमा आजको बैठकका लागि सबै आधारहरु तयार पारिएको परिषदका एक सदस्यले बताए।
जसका कारण आजकेा परिषद बैठकमा एमाओवादी अध्यक्ष प्रचण्ड वा अन्य कुनै सदस्यहरु अनुपस्थित रहेमा वा बैठकको निर्णयमा असहमति जनाएमा पनि परिषदको बहुमतको निर्णय बैद्य हुने छ।
परिषदका एक सदस्यले दिएकेा जानकारी अनुसार, आजको बैठकले लोकसेवा आयोगका अध्यक्ष सहित अन्य सदस्यको अलवा सकभर अख्तियार र निर्वाचन आयोगमा रिक्त रहेका पदाधिकारीकेा पदपूर्तिका लागि पनि सिफारिस गर्न सक्ने छ।
अन्तरिम संविधानले लोकसेवा आयोग र अख्तियार प्रमुख सहित आवश्यक संख्यामा सदस्यहरु रहने उल्लेख गरे पनि विगतमा चलिआएको अभ्यास अनुसार त्यी निकायमा अध्यक्ष सहित बढीमा ५ जना पदाधिकारी रहदै आएका छन्।
प्रमुख र एक सदस्यमात्र रहेको अख्तियारमा अन्य तीन पद र निर्वाचन आयोगमा हालै पदमुक्त भएका आयुक्त पि वि ठाकुरको स्थानमा परिषदले पदपूर्तिकेा सिफारिस गर्नु पर्ने छ।
परिषदको बैठकले पदपूर्तिकेा सिफारिस गरेको ३५ दिनभित्र सिफारिसमा परेका व्यक्तिहरुको क्षमता, योग्यता लगायतका विषयमा संसदीय विशेष सुनुुवाई समितिले सुनुवाई गरिसक्नु पर्ने छ।
