एनेकपा माओवादीका उपाध्यक्ष नारायणकाजी श्रेष्ठले कांग्रेस र एमालेले सहमतिबाटै अघि बढ्ने पूर्ण प्रतिबद्धता र अहिलेको प्रक्रियालाई स्थगन् गरेर आएमा पुनः संवाद सुरु भई संविधान लेखन प्रक्रियामा नयाँ शिराबाट सहमति हुने बताएका छन्।
रिपोर्टर्स क्लब नेपालले आईतबार विहान उनकै निवासमा पुगि 'राजनीतिक दलहरुलाई तत्काल संवाद सुरु गर' अभियान अन्तर्गत बुझाएको ज्ञापन पत्र ग्रहण गर्दै उपाध्यक्ष श्रेष्ठले सत्ताधारी राजनीतिक दलहरुलाई भने–'कांग्रेस–एमालेले बहुमतको हठ त्याग्नु पर्दछ र सहमतिबाट अघि बढ्न तयार हुनुपर्दछ, यदि उहाँहरुले सहमतिबाटै संविधान जारी गर्नुपर्छ भन्ने प्रतिबद्धता देखाउनुहुन्छ भने अझैपनि सहमति र वार्ताको सम्भावना छ।' उनले अहिलेको गत्यावरोध अन्त्य गर्न काँग्रेस र एमालेले प्रक्रियाको हठ त्याग्नुपर्ने बताए।
उपाध्यक्ष श्रेष्ठले एमाओवादी वार्ता र सहमतिको विरोधी नभएको बताउँदै बहुमतीय प्रक्रिया सुरु गरेर कांग्रेस र एमालेले नै वार्ताको ढोका बन्द गरेको आरोप लगाए। बहुमतीय प्रक्रिया जहाँको त्यहीँ रोकेर सहमतिबाट अघि बढ्ने प्रतिबद्धतासाथ वार्ता गर्न चाहने हो भने पुनः वार्ता सुरु हुनसक्ने श्रेष्ठको भनाई थियो।
एमाओवादीको सत्तासाझेदारीको वारेमा पत्रकाहरुले गरेको प्रश्नमा नेता श्रेष्ठले एकीकृत माओवादीले संविधानका अन्तरवस्तुलाई सहमतिकै आधारमा टुङ्ग्याएर सहमतिमा पुग्ने बाहेक अन्य विषयलाई एजेण्डा नबनाएको भन्दै भने–'अहिले हाम्रो एक सूत्रीय एजेण्डा भनेको नै संविधानसभाबाट संविधान जारी गर्नु हो, त्यो बाहेक अन्यत्र वार्ताको एजेण्डा बनाएर संविधान जारी गर्ने कुरालाई अबरोध गर्न चाहदैनौं।'
ज्ञापनपत्र ग्रहण गर्दै नेता श्रेष्ठले जनताले ऐतिहासिक संघर्ष गरेर प्राप्त गरेका उपलब्धीहरुलाई पूर्णरुपमा संस्थागत गर्नपनि नयाँ संविधान जारी गर्नुको विकल्प नभएको बताउँदै सहमतिको आधारमा नै नयाँ संविधान निर्माण हुनुपर्ने पार्टीको स्पष्ट अडान रहेको बताए। उनले भने 'सहमति भनेको सर्वसहमति भन्ने हुँदैन, तर जनआन्दोलन, १२ बुँदे सम्झौता, विस्तृत शान्ति सम्झौता र ऐतिहासिक सम्झौताका सहयात्रीहरुबिच सहमति अनिवार्य छ।'
उनले आफूहरुले देशलाई द्धन्द्धमा धकेल्न नचाहेको भन्दै भने–'काँग्रेस, एमालेले हठात् बहुमतीय प्रक्रियालाई अघि बढाएपछि हामीहरु आन्दोलनमा जानु परेको हो, यो हाम्रो बाध्यता हो।'
श्रेष्ठले सहमतिको लागि दलहरुवीच प्रक्रियाले एक स्टेप फड्को मारेपछि र सहमतिबाटै संविधान बन्ने कुराले मूर्त रुप लिनै आँट्दा सत्तारुढ दलले बहुमतीय प्रक्रियामा बलाद जाने निर्णय गसिकेपछि वार्ता र सम्वादको ढोका बन्द भएको आरोप लगाउँदै भने–'मैले उहाँहरु प्रक्रियामा गएकै दिनपनि त्यो ऐतिहासिक भूल भयो भनेर भनेकै हो, अब उहाँहरु बहुमीय प्रक्रियाबाट होईन, सहमतिबाटै संविधान बन्नुपर्छ भनेर आउनु भयो भने फेरि पनि नयाँ शीराबाट वार्ता हुने सम्भावना छ।'
प्रक्रियाबाट संविधान लेखन थालेका सत्तारुढ दलका विरुद्धको आन्दोलन, संविधानसभाभित्रको संघर्ष र वार्ताको टेवलमा सकारात्मक ढंगबाट अघि बढाउने सन्दर्भमा पार्टीभित्र सबै एकमत रहेको पनि श्रेष्ठले दाबी गरे। संसदीय समिति छोडेको बारेमा संविधानसभा छोड्ने कुरा नभएको श्रेष्ठले बताए। उनले भने–'संविधानसभा छोड्ने कुरा नै आएको छैन, यदि त्यस्तो अवस्था आयो भने त्यतिखेर पार्टीभित्र मेरो दुई लाईनको संघर्ष हुन्छ।' यद्धपी श्रेष्ठले अहिलेको आन्दोलन परिवर्तनका उपलब्धिहरुलाई संस्थागत गर्न जनजागरणको लागि भएको समेत स्पष्ट पारे।